އަލްޖަޒީރާއިން ރިޕޯޓު ކުރާގޮތުގައި އިއްޔެ އިސްރާއީލުގެ ހަމަލާތަކުގައި ޣައްޒާގެ އެކި ސަރަޙައްދުތަކުގައި 70 އެއްހާ ފަލަސްޠީނު މީހުން ޝަހީދުވެއްޖެއެވެ. އަދި އެ ސަރަޙައްދުގައި އިސްރާއީލުގެ ލާއިންސާނީ ސިފައިން ވަނީ އެއްގަމު މަގުންވެސް ހަމަލާތައް ދޭން ފަށަފައެވެ.
އިސްރާއީލު ސިފައިން މި ޙަމަލާ ދިން ވަގުތު ގިނަ ބަޔަކު ނިދާފައި ތިބި ކަމަށް ލޯކަލް މީޑިއާތަކުން ރިޕޯޓުކޮށްފައިވެއެވެ. ޙަމަލާ ފެށުނީ ރޭގަނޑު 1:00 ގެ ކުރިންކަމަށް ބެލެވެއެވެ. އިސްރާއީލު ސިފައިން ބޭނުންކުރި ހަތިޔާރުތަކުގެ ތެރޭގައި މިސައިލްތަކާއި ބޮޑެތި މެޝިންގަންތައް ހިމެނޭ ކަމަށް ޢައިން ހެކިން ބުނެފައިވެއެވެ.
އަންގާރަ ދުވަހު އިސްރާއީލުން ހުއްޓުމަކަށް ގެނައި ހަނގުރާމަ ހުއްޓުމަށްފަހު، މިހާތަނަށް 436 ފަލަސްޠީނުން މަރުވެފައިވާ ކަމަށް ޣައްޒާގެ ސިއްޙީ ވުޒާރާއިން ބުނެއެވެ. އޭގެ ތެރޭގައި 183 ކުޑަކުދިން ހިމެނެއެވެ.
ފަލަސްތީނުގެ ރައީސް މަޙްމޫދު ޢައްބާސް މި ޙަމަލާ ކުށްވެރިކުރައްވައި، މިއީ ”ނުރައްކާތެރި ކުށެއް“ ކަމަށް ވިދާޅުވެފައިވެއެވެ. އަދި ބައިނަލްއަޤްވާމީ މުޖުތަމަޢުން މި ޙަމަލާ ހުއްޓުވުމަށް ވަގުތުން ފިޔަވަޅު އެޅުމަށް ގޮވާލައްވާފައިވެއެވެ.
އިސްރާއީލުގެ ހައްދުފަހަނައަޅާފައިވާ ބޮޑުވަޒީރު ބެންޖަމިން ނެތަންޔާހޫ އިންޒާރުދީފައިވަނީ ”ޣައްޒާގައި ހަމާސްއާ ދެކޮޅަށް ކުރަމުންދާ ގަދަފަދަ ހަނގުރާމައިގެ“ އިތުރުން އިސްރާއީލުން އޮކިއުޕައިޑް ވެސްޓް ބޭންކުގައި ”އިތުރަށް ބޮޑު އަދި ވަރުގަދަ ފްރޮންޓެއްގައި“ ހަނގުރާމަ ކުރަން ޖެހިދާނެ ކަމަށެވެ.
ޣައްޒާގެ ސިއްޙީ ވުޒާރާއިން ބުނާ ގޮތުގައި އިސްރާއީލުން ޣައްޒާގައި ކުރަމުންދާ ހަނގުރާމައިގައި މަދުވެގެން 49,547 ފަލަސްޠީނުން މަރުވެފައިވާކަން ކަށަވަރުވެފައިވެއެވެ. އަދި 112,719 މީހުން ޒަޚަމްވެފައިވެއެވެ. ޣައްޒާގެ ގަވަރމަންޓް މީޑިއާ އޮފީހުން މަރުވި މީހުންގެ އަދަދު އަޕްޑޭޓްކޮށް 61,700 އަށްވުރެ ގިނަ ކަމަށް ބުނެފައިވެއެވެ. އަދި ވެއްޔާއި ސިމެންތި ތެރޭގައި ގެއްލިފައިވާ ހާހުން ފަލަސްޠީނުން މަރުވެފައިވާ ކަމަށް ލަފާކުރެވެއެވެ. 2023 ވަނަ އަހަރުގެ އޮކްޓޯބަރު 7 ވަނަ ދުވަހު ފެށި ހަމަލާތަކުގައި އިސްރާއީލުގައި މަދުވެގެން 1,139 މީހުން މަރުވެފައިވެއެވެ. އަދި 200 އަށްވުރެ ގިނަ މީހުން ހައްޔަރުކޮށްފައިވެއެވެ.
އިސްރާއީލުގެ ސިފައިންގެ ފަރާތުން މި ޙަމަލާއާ ގުޅޭގޮތުން އަދި ރަސްމީ ބަޔާނެއް ނެރެފައެއް ނުވެއެވެ. ނަމަވެސް، އިސްރާއީލުން އާންމުކޮށް ބުނަމުން އަންނަނީ މިފަދަ ޙަމަލާތަކަކީ ”ޓެރަރިސްޓުން“ ހައްޔަރުކުރުމަށް ހިންގާ އޮޕަރޭޝަންތަކެއް ކަމަށެވެ.
އެމެރިކާގެ މަދަދުވެރިކަމާއި އެކު ދެމުންދާ މި ޙަމަލާއާ ގުޅިގެން ބައިނަލްއަޤްވާމީ މުޖުތަމަޢުގެ ކަންބޮޑުވުން ފާޅުކުރަމުންދާއިރު، އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް ވަނީ މި ޙަމަލާ ކުށްވެރިކުރައްވާފައެވެ. އަދި ހުރިހާ ފަރާތްތަކަށް އަވަހަށް ހަމަޖެހުމަކަށް އައުމަށް ގޮވާލައްވާފައިވެއެވެ.