ޢަރަބި ލީގުގެ އާ ސެކްރެޓަރީ ޖެނެރަލްގެ މަޤާމަށް މިޞްރުގެ ކުރީގެ ޚާރިޖީ ވަޒީރު ނަބީލް ފަހުމީ މިއަދު ޢައްޔަންކޮށްފިއެވެ.
މި ޢައްޔަންކުރުން އައީ އުރުދުންގެ ވެރިރަށް ޢައްމާނުގައި ބޭއްވި ޢަރަބި ލީގުގެ 165 ވަނަ ޢާންމު ޖަލްސާގައެވެ. ޢުމުރުން 75 އަހަރުގެ ފަހުމީ ފަސް އަހަރުގެ ދައުރަކަށް މަޤާމާ ޙަވާލުވެވަޑައިގަންނަވާނީ ޖުލައި 1 ގައެވެ. އެމަނިކުފާނު ބަދަލުކުރައްވަނީ ޖެހިޖެހިގެން ދެ ދައުރު ފުރިހަމަކުރެއްވި އަޙްމަދު އަބޫލް ޣޮތެވެ. ތަޖުރިބާކާރު ޑިޕްލޮމެޓް ފަހުމީ ވަނީ 2013 ޖޫންއިން 2014 ޖުލައިއާ ހަމައަށް މިޞްރުގެ ޚާރިޖީ ވުޒާރާ ހިންގަވައިފައެވެ. 22 މެންބަރު ޤައުމުގެ މައްޗަށް އެކުލެވޭ މި ޖަމާޢަތުގެ ވެރިޔާކަމަށް އެމަނިކުފާނު މާޗް މަހު އިއްތިފާޤުން ނޮމިނޭޓް ކުރެވުނެވެ.
މިޞްރުގެ ޚާރިޖީ ވުޒާރާއިން ނެރުނު ބަޔާނެއްގައި ބުނީ ”މި ނިންމުމަކީ ނަބީލް ފަހުމީގެ ކިބައިގައިވާ ޑިޕްލޮމެޓިކް ތަޖުރިބާއާއި، ސަރަޙައްދީ އަދި ބައިނަލްއަޤުވާމީ މައިދާނުގައި ޢަރަބި ޙަރަކާތްތަކަށް އެމަނިކުފާނު ކޮށްދެއްވި ޚިދުމަތްތަކުގެ އަގު ވަޒަންކުރުމުގެ ރަމްޒެއް“ ކަމަށެވެ. އަދި އެ ވުޒާރާއިން ވަނީ ”ޢަރަބި ގުޅިފައިވާ މަސައްކަތް ވަރުގަދަކޮށް، ޢަރަބި ރައްޔިތުންގެ ހަމަޖެހުމާއި ތަރައްޤީގެ އުންމީދުތައް ޙާޞިލުކުރުމުގައި“ ކާމިޔާބީއަށް އެދިފައެވެ.
ފަހުމީ ވެވަޑައިގަންނަވަނީ 1945 ގައި ޢަރަބި ލީގު އުފެދުނު ފަހުން އެ ޖަމާޢަތުގެ 9 ވަނަ ސެކްރެޓަރީ ޖެނެރަލަށެވެ. އަދި މި މަޤާމު ފުރުއްވާ 8 ވަނަ މިޞްރު ބޭފުޅާއަށެވެ. ޤާހިރާގައި މައި މަރުކަޒު ހުންނަ މި ޖަމާޢަތުގައި މިޞްރު ނޫން ޤައުމެއްގެ ބޭފުޅަކު ސެކްރެޓަރީ ޖެނެރަލްކަން ކުރެއްވީ ހަމައެކަނި 1980 ގެ އަހަރުތަކުގައި ތޫނިސްގެ ޝާޛިލީ ޤްލީބީއެވެ. އެއީ އިސްރާއީލާ އެކު ޞުލްޙައިގެ އެއްބަސްވުމެއްގައި ސޮއިކުރުމާ ގުޅިގެން މިޞްރު ސަސްޕެންޑް ކުރެވިފައި އޮތް ދައުރެކެވެ.