އިދިކީލަ ކައުންސިލްތަކަށް އަނެއްކާވެސް ފުރުސަތު ދީފިނަމަ ކުރިއަށް އޮތް ތަނުގައި ވެސް ސަރުކާރަށް ޖެއްސުންކުރާނެ ކަމަށް ކޮންގްރެސް ޕާޓީގެ ޕީޖީ ގްރޫޕުގެ ނައިބު ލީޑަރު އަދި ވިލިމާލެ ދާއިރާގެ މެންބަރު މުހައްމަދު އިސްމާއިލް ވިދާޅުވެއްޖެއެވެ.
ކޮންގްރެސް ޕާޓީގެ ހދ. އަތޮޅުގެ މާލެ ކެމްޕެއިން ޖަގަހަ ހުޅުވުމަށް ރޭ ބޭއްވި ޖަލްސާގައި ވާހަކަދައްކަވަމުން މުހައްމަދު ވިދާޅުވީ ޕީއެންސީން ސަރުކާރަށް އެއްބާރުލުންދޭނެ ކެންޑިޑޭޓުން އިންތިހާބުކޮށްގެން ނޫނީ ސަރުކާރުން ބޭނުންވާ ތަރައްގީ ފުރިހަމައަށް ނުގެނެވޭނެކަން މާޒީގައި ނިމިދިޔަ ވެރިކަންތަކުން ވަރަށް ރަނގަޅަށް ސާފުވާ ކަމަށެވެ.
މުހައްމަދު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ ބޮޑުތިލަދުންމައްޗަށް ނިސްބަތްވެވަޑައިގަންނަވާ ބޭފުޅެއް ކަމަށާއި، ގައުމީ މަސައްކަތުގައި ވަރަށް ގިނަ ތާރީހު އޮތް އަބްތޯލުންތަކެއްވެސް ބޮޑުތިލަދުންމަތީގައި އުފެދިފައިވާ ކަމަށެވެ. އެގޮތުން ރައީސް ބޭނުންވެވަޑައިގަންނަވާ ގޮތަށް، ރައްޔިތުންގެ ފުރިހަމަ ތާއީދާއެކު ކުރިއަށް އޮތް ލޯކަލް ކައުންސިލް އިންތިހާބުގައި ހދ. އަތޮޅުން ޕީއެންސީން ތަފާތު ދައްކާނެ ކަމަށް މުހައްމަދު އިސްމާއިލް ވިދާޅުވިއެވެ.
މުހައްމަދު ވިދާޅުވީ ރައީސުލްޖުމްހޫރިއްޔާ ވެރިކަމާއި ހަވާލުވެވަޑައިގެންނެވި ހިސާބުން ފެށިގެން ރާއްޖޭގެ ތުރާކުނުން ފެށިގެން އައްޑޫއާއި ދޭތެރޭގައި ފަށާފައިވާ މަޝްރޫއުތައް ރައްޔިތުންނާ ގާތުން ކުރިއަށްގެންދިއުމަށްޓަކައި ކައުންސިލްތަކެއް އެކުލަވާލަންޖެހޭ ކަމަށެވެ. އެގޮތުން ސަރުކާރުން ތާއީދު ކުރާ ކައުންސިލްތަކެއް އެކުލަވާ ނުލެވިއްޖެނަމަ އެ މަޝްރޫއުތަކުގައި ލަސްތަކެއް ކުރިމަތިކުރުވާނެ ކަމަށް އޭނާ ވިދާޅުވިއެވެ.
މުހައްމަދު ވިދާޅުވީ ސަރުކާރުން ހިންގަން ބޭނުންވާ މަޝްރޫއުތަކަށް ބޭނުންވާ ބިން ހޯދުމަށް އެދުމުން އެމްޑީޕީއަށް ނިސްބަތްވާ ކައުންސިލްތަކުން ބިން ދޫނުކޮށް ހިފަހައްޓާފައި އެބަހުރި ކަމަށެވެ. މިފަދަ ސަބަބުތަކާހުރެ، ސަރުކާރާއި އިދިކީލަ ކައުންސިލްތައް އިންތިހާބުކޮށްގެން ރައީސުލްޖުމްހޫރިއްޔާ ބޭނުންވާ ދުވެލީގައި މަޝްރޫއުތައް ކުރިއަށްގެންދިއުމުގައި ދަތިތަކެއް ކުރިމަތިވާނެ ކަމަށް އޭނާ ވިދާޅުވިއެވެ.
މީގެ އިތުރުން މާލެ ސިޓީއަށް ފުރިހަމަ ތަރައްގީއެއް ގެނައުމަށްޓަކައި، ޕީއެންސީގެ މޭޔަރު ކެންޑިޑޭޓުން މޫސާ އަލީ ޖަލީލް އާއި، އަންހެނުންގެ ތަރައްގީއަށް މަސައްކަތްކުރާ ރައީސާކަމަށް ވާދަކުރައްވާ ކެންޑިޑޭޓު އާޝިޔަތު އަލައިކާ އަދުނާންވެސް އިންތިހާބު ކުރަން ޖެހޭ ކަމަށް މުހައްމަދު ވިދާޅުވިއެވެ.
މުހައްމަދު އިތުރަށް ވިދާޅުވީ މީގެ ކުރިންވެސް ވެރިކަންތަކެއް ނިމިގެންދިޔައިރު، އިންތިހާބަކާއި ދިމާކޮށް އަތޮޅު ތެރޭގެ އެއްވެސް ޖަގަހައެއް މާލޭގައި ހުޅުވާފައި ނުވާކަމަށެވެ. އަދި ޕާޓީގެ ތެރެއިން އިސްވެހުރެ، ޕާޓީގެ ލީޑަރު އަދި ރައީސުލްޖުމްހޫރިއްޔާ މަސައްކަތްޕުޅު ކުރައްވަމުން އަންނަ ފަދައިން މީގެ ކުރިން އެއްވެސް ބޭފުޅަކު މަސައްކަތް ކުރައްވާފައި ނުވާ ކަމަށް ވެސް އޭނާ ވިދާޅުވިއެވެ.
މުހައްމަދުގެ ވާހަކަފުޅު ނިންމަވާލައްވާފައިވަނީ ޕީއެންސީގެ ކެންޑިޑޭޓުންނަށް ވޯޓުދިނުމަށް ރައްޔިތުންގެ ކިބައިން އެދިވަޑައިގަންނަމުންނެވެ.