މ. ރަތްމަންދޫ ރައްޔިތުން ކ. ތުލުސްދޫއަށް ބަދަލުކުރުމަށް، އެރަށު ކައުންސިލުން މިހާރު ބިން ހަމަޖައްސައިދީފައިވާކަން ރަތްމަންދޫ ކައުންސިލަށް އަންގާފައިވާކަމަށް ހައުސިން މިނިސްޓްރީން ބުނެފިއެވެ.
ރަތްމަންދޫގެ އާބާދީއަކީ، 240 އެވެ. އެކަމަކު ރަށުގައި އުޅެނީ 80 ވަރަކަށް މީހުންނެވެ. އޭގެތެރެއިން %34 މީހުންގެ އަމިއްލަ ބޯހިޔާވަހިކަމެއް ނެތެވެ. އަދި ރަށުގައި އަސާސީ ޚިދުމަތްތައްވެސް އެންމެ އެކަށީގެންވާ ގޮތުގައި ނުލިބެއެވެ.
ރަތްމަންދޫ ރައްޔިތުން އެހެން ރަށަކަށް ބަދަލުވާން ނިންމާތާ އެއް އަހަރު ދުވަހުގެ ތެރޭގައި އެ ރަށު ރައްޔިތުންނަށް ބޭނުންވާ ގެދޮރު އަޅައިދޭނެ ކަމަށް ރައީސް ޑރ. މުހައްމަދު މުއިއްޒު ވަނީ މީގެކުރިން ވިދާޅުވެފައެވެ.
ހައުސިން މިނިސްޓްރީން ބުނީ، ރަތްމަންދޫ ރައްޔިތުން ބަދަލު ކުރުމަށް ނިންމާފަވަނީ ކ. ތުލުސްދޫއަށް ކަމަށެވެ. ރަތްމަންދޫ ރައްޔިތުން ތުލުސްދޫއަށް ބަދަލު ކުރުމުގެ މަސައްކަތް ކުރިއަށް ގެންދިއުމަށްޓަކައި ކ.ތުލުސްދޫގައި އާބާދުވުމަށް ބޭނުންވާ 44 ގޯތި ހަމަޖައްސައި، އެކަން ތުލުސްދޫ ކައުންސިލުން އެ މިނިސްޓްރީއަށް ވަނީ އަންގާފައެވެ.
އެހެންކަމުން ގެދޮރު ބިނާކުރުމުގެ އަމަލީ މަސައްކަތް ފެށުމުގެ ކުރިން ފުރިހަމަކުރަންޖެހޭ ކަންކަން ކުރަމުން އަންނަ ކަމަށް އެ މިނިސްޓްރީން ބުންޏެވެ.
އެއްފަސްކުރުމުގެ މަސައްކަތުގެ ދަށުން، ރައީސުލްޖުމްހޫރިއްޔާގެ ތަޞައްވުރަކީ ރަށުގައި ރަޖިސްޓަރކޮށްފައިވާ ކޮންމެ ގެއަކަށް، ބަދަލުވާ ރަށުގައި 3 ކޮޓަރީގެ ގެއެއް އަޅައިދިނުމެވެ. އަދި މިގޮތަށް ހިޖުރަކުރާ އާއިލާތަކަށް މިހާރު ދެމުންދާ 50،000ގެ އިނާޔަތް ރިވައިސްކޮށް އަދަދު ބޮޑުކުރައްވާނެ ކަމަށް ރައީސް ވަނީ ވިދާޅުވެފައެވެ.
ހދ. ހިރިމަރަދޫ ރައްޔިތުން އެ އަތޮޅު ހަނިމާދުއަށް ބަދަލުކުރުމަށްޓަކައި ހައުސިން ޔުނިޓްތައް އިމާރާތްކުރުމަށް އެޗްޑީސީއާ ވަނީ ހަވާލުކޮށްފައެވެ.