ޗާގޯސް ލިބުން އެންމެ ހައްގުކަންބޮޑީ ރާއްޖެއަށް ކަމަށް ބުނެ އަދުގެ ސަރުކާރުން ވަކާލާތު ކުރާތީ، މޮރިޝަސް ސަރުކާރުން ރާއްޖެއާއެކު އޮތް ޚާރިޖީ ގުޅުންތައް ވަގުތުން މެދުކަނޑާލުމަށް ނިންމައިފިއެވެ.
މޮރިޝަސްގެ ކެބިނެޓުން މި ނިންމުން ނިންމާފައިވާކަން އެގައުމުގެ ބޮޑުވަޒީރުގެ އޮފީހުން އިއްޔެ ވަނީ އިއުލާންކޮށްފައެވެ.
އެގޮތުން ކެބިނެޓްގެ ނިންމުން އިއުލާންކޮށް ބޮޑުވަޒީރު އޮފީހުން ހާމަކުރި ގޮތުގައި، ޗާގޯސްގެ މައްޗަށް އެ ގައުމުގެ ސިޔާދަތީ ބާރު އޮތް ކަމަށް ކުރިން ރާއްޖެއިން ގަބޫލުކުރި ނަމަވެސް، ދިވެހި ސަރުކާރުގެ މިހާރުގެ ނިންމުމަކީ އެކަން ބަލައިނުގަތުމެވެ.
އެމްޑީޕީ ސަރުކާރުން ވަނީ ޗާގޯސް މޮރިޝަސްއަށް ދިނުމާއި ގުޅޭގޮތުން އެއްބަސްވުމަކަށް އައިސްފައެވެ. އެހެންނަމަވެސް ރައީސް ޑރ. މުޙައްމަދު މުޢިއްޒު ނިންމާފައިވަނީ ޗާގޯސްއަކީ ރާއްޖެއަށް ލިބެންޖެހޭނެ ތަނެއްގެ ގޮތުގައި ބުނެ އެތަން ހޯދުމަށް އަމަލީ ގޮތުން މަސައްކަތްތައް ފަށާފައެވެ.