މާލޭގެ މަގުތަކުގައި ފެންބޮޑުވާ މައްސަލައަށް ދާއިމީ ހައްލެއް ހޯދުމަށްޓަކައި، ފެން ހިންދާ ނިޒާމު އޮޓޮމޭޓްކުރުމުގެ މަސައްކަތް ޖަޕާނުގެ ޓެކް އިންޓަރނޭޝަނަލް އިންކޯޕަރޭޝަނާ ހަވާލުކޮށްފިއެވެ.
މިއީ ޖަޕާނު ސަރުކާރުގެ އެހީގައި ކުރިއަށްގެންދާ ”ޑިޒާސްޓަރ ރެޒިލިއަންސް އެންހޭންސްމަންޓް އިން މާލެ އައިލެންޑް“ ޕްރޮޖެކްޓުގެ ދަށުން ހިންގާ މަޝްރޫއެކެވެ.
މި މަޝްރޫއުގެ ދަށުން މާލޭގެ 16 ޕަމްޕު ސްޓޭޝަނެއް އޮޓޮމޭޓްކޮށް، އެ ތަންތަން މޮނިޓަރކުރާނެ މަރުކަޒީ ނިޒާމެއް ގާއިމުކުރުމަށް ވަނީ ހަމަޖެހިފައެވެ. މީގެ އިތުރުން ނިޒާމު ބެލެހެއްޓުމަށް ބޭނުންވާ ޖެޓިންގް ވެހިކަލެއް ހޯދުމަށް ވެސް ވަނީ ނިންމާފައެވެ. މި މަސައްކަތުގެ ސަބަބުން ޕަމްޕު ސްޓޭޝަންތަކުގެ ހާލަތު 24 ގަޑިއިރު މޮނިޓަރކުރެވި، ފެން ހިންދުމުގެ މަސައްކަތް އިތުރަށް ހަރުދަނާވެގެންދާނެއެވެ.
ޖުމްލަ 1.5 މިލިއަން ޑޮލަރު ހަރަދުވާ މި މަސައްކަތް ނިންމުމަށް ހަމަޖެހިފައިވަނީ 487 ދުވަހުގެ ތެރޭގައެވެ. މި ޕްރޮޖެކްޓުގެ ފުރަތަމަ ޕެކޭޖުގެ ދަށުން މާލޭގެ ބޭރުތޮށި މަރާމާތުކުރުމުގެ މަސައްކަތް ވެސް މިހާރު ވަނީ ޖަޕާނުގެ އެހެން ކުންފުންޏަކާ ހަވާލުކޮށްފައެވެ.