ފާއިތުވި ތިން އަހަރުގެ ތެރޭގައި ރާއްޖޭގެ އެކި ހޮސްޕިޓަލްތަކުން ނަފްސާނީ އެކި ބަލިތަކަށް 70،000 އަށް ވުރެ ގިނަ މީހުން ފަރުވާ ހޯދާފައިވާ ކަމަށް ނެޝަނަލް މެންޓަލް ހެލްތު ޑިޕާޓްމަންޓުން ބުނެފިއެވެ.
ހެލްތު މިނިސްޓްރީގެ ނައިބު އައިމިނަތު އިސްމާއިލް ދައުލަތުގެ މީޑިއާ، ޕީއެސްއެމްގައި ވިދާޅުވީ ރާއްޖޭގައި ނަފްސާނީ އެކި ކަންކަމުގައި ތަފްޞީލީ ދިރާސާއެއް މިހާތަނަށް ހެދިފައި ނެތަސް ހޮސްޕިޓަލްތަކުގެ ތަފާސްހިސާބުތަކާއި 2022 ގައި ހަދާފައިވާ ގެޕްސް ދިރާސާއިން ދައްކާގޮތުން ރާއްޖޭގައި ކޮންމެ 5 މީހަކުން 1 އަކީ ޑިޕްރެޝަން އަލާމަތްތައް ފެންނަ މީހެއް ކަމަށެވެ. އަދި އަމިއްލަ ނަފްސަށް ގެއްލުން ދިނުމުގެ ޚިޔާލު ހުންނަ މީހުން ވެސް ފާހަގަކުރެވޭ ކަމަށް އެދިރާސާއިން ހާމަވެ އެވެ.
އައިމިނަތު ވިދާޅުވީ އެ އަދަދުތަކަށް ބަލާއިރު މިއީ ކަންބޮޑުވާން ޖެހޭ މިންވަރެއް ކަމަށެވެ
އޭނަ ވިދާޅުވީ ދިރާސާތަކުގެ ނަތީޖާ އަށް ބަލައި ކަންބޮޑުވާންޖެހޭ ފަދަ ކަންކަމަށް ޚާއްސަ ސަމާލުކަން ދީގެން އަަދަދުތައް މަދު ކުރަން މިނިސްޓްރީ އާއި އެކި ޖަމިއްޔާ ޖަމާއައްތަކުން ގުޅިގެން މަސައްކަތް ކުރަމުން އަންނަ ކަމަށެވެ. އަދި އަމިއްލަ ފަރުދުންގެ ތެރެއިން ވެސް އެހީތެރިކަން ފޯރުކޮށް ދިނުމަށް ބޭނުންވާ ފަރާއްތަކާ އެކު މަސައްކަތް ކުރަމުން އަންނަ ކަމަށް ވިދާޅުވި އެވެ.
އައިމިނަތު ވިދާޅުވީ ދުނިޔޭގެ ނިސްބަތުން ބެލިޔަސް ނަފްސާނީ ޞިއްޙަތުގެ ދާއިރާއަކީ މީހުން މަދު ދާއިރާއެއް ކަމަށެވެ. އެހެންވެ ރާއްޖޭގައި ވެސް އެ ދާއިރާއިން މީހުން ބިނާކުރުމަށް މަސައްކަތް ކުރެވެމުން އަންނަ ކަމަށް ވިދާޅުވި އެވެ.
ނެޝަނަލް މެންޓަލް ހެލްތު ޑިޕާޓްމަންޓުން ބުނީ މިދިޔަ އަހަރު ކުރެވެނުނު މަސައްކަތުން ނަފްސާނީ ބަލިތަކަށް ފަރުވާކޮށް ޖުމްލަ 23 މީހުން އަނބުރާ އާއިލާއާ ހަވާލުކޮށްފައިވާ ކަމަަށެވެ.