ހދ. ކުޅުދުއްފުށި ސިޓީގައި އިމިގްރޭޝަންގެ ޚިދުމަތްތައް އިތުރަށް ހަރުދަނާކޮށް ފުޅާކުރުމުގެ ގޮތުން ޤާއިމުކޮށްފައިވާ އައު ރީޖަނަލް އޮފީސް މިއަދު ރަސްމީކޮށް ހުޅުވައިފިއެވެ.
މި އޮފީސް ހުޅުއްވައިދެއްވީ ޑެޕިއުޓީ ކޮންޓްރޯލަރ ޖެނެރަލް އޮފް އިމިގްރޭޝަން އަޙްމަދު އަޝްފާންއެވެ.
މިއަދު ހެނދުނު ކުޅުދުއްފުށީގައި ބޭއްވި ޚާއްޞަ ރަސްމިއްޔާތެއްގައި ވާހަކަދައްކަވަމުން ޑެޕިއުޓީ ކޮންޓްރޯލަރ ޖެނެރަލް އަޙްމަދު އަޝްފާން ވިދާޅުވީ، މި އައު އޮފީހާއެކު އެ ސިޓީގައި މަސައްކަތް ކުރާ އޮފިސަރުންނަށް ކުރިމަތިވެފައިވާ ޖާގައިގެ ދަތިކަމަށް ދާއިމީ ޙައްލެއް ލިބިގެންދާނެ ކަމަށެވެ. އަދި މީގެ ސަބަބުން މަސައްކަތުގެ މާޙައުލަށް ބޮޑު ކުރިއެރުމެއް އަންނާނެކަން އޭނާ ފާހަގަކުރެއްވިއެވެ.
އިމިގްރޭޝަނުން މަޢުލޫމާތު ދޭ ގޮތުގައި، މި އައު އޮފީސް ޤާއިމުކުރުމުގެ އެންމެ ބޮޑު އެއް ބޭނުމަކީ އެ ސަރަޙައްދުގައި ދިރިއުޅޭ ރައްޔިތުންނަށް އިމިގްރޭޝަންގެ ޚިދުމަތްތައް ފޯރުކޮށްދިނުމުގައި އިތުރު ލުއިފަސޭހަތަކެއް މަގުފަހިކޮށްދިނުމެވެ. މި ބަދަލާއެކު ޚިދުމަތުގެ ފެންވަރު ރަނގަޅުވެ، ރައްޔިތުންނަށް އަވަސް ޚިދުމަތެއް ލިބިގެންދާނެ ކަމަށް އެ މުއައްސަސާއިން އުންމީދު ކުރެއެވެ.
ކުޅުދުއްފުށީގައި ހުޅުވުނު މި އައު އޮފީހަކީ އަތޮޅުތެރޭގައި އިމިގްރޭޝަންގެ ޚިދުމަތްތައް ލާމަރުކަޒީކޮށް، ރައްޔިތުންނާ ގާތުން ޚިދުމަތް ދިނުމަށް ކުރަމުންދާ މަސައްކަތުގެ ތެރެއިން އެޅުނު މުހިންމު ފިޔަވަޅެކެވެ.