ދިވެހިބަސް އުނގަންނައި ދެއްވުމާއި، ތައުލީމީ ދާއިރާއަށް ދިގު މުއްދަތަކަށް ޚިދުމަތް ކުރެއްވި އާމިނަތު ޙަސަން (އައިންތު މިސް) ނިޔާވުމުގެ ހިތާމައިގައި ރައީސް ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
އުމުރުން 58 އަހަރުގައި އައިންތު މިސް ނިޔާވެފައިވަނީ ކެންސަރުގެ އާލާސްކަންފުޅެއްގައި އައިޖީއެމްއެޗްގައި ފަރުވާ ހޯދަމުން ދަނިކޮށެވެ.
ރައީސުލްޖުމްހޫރިއްޔާ ސޯޝަލް މީޑިއާގައި ހިއްސާކުރެއްވި މެސެޖެއްގައި ވިދާޅުވީ، ދިވެހިބަސް ކުރިއެރުވުމާއި ކިޔަވައިދިނުމުގައި އައިންތު މިސް ކުރެއްވި މަސައްކަތްތައް ފާހަގަކުރައްވާ ކަމަށެވެ.
އައިންތު މިސް ވަކިވުމުގެ ހިތާމައިގައި ބައިވެރިވެ، އާއިލާއަށާއި ތައުލީމީ އަދި އަދަބީ ދާއިރާގައި މަސައްކަތްކުރާ ހުރިހާ ބޭފުޅުންނަށް ރައީސް ތައުޒިޔާ ފޮނުއްވިއެވެ.
”މަރްޙޫމާ އާމިނަތު ޙަސަނަށް މާތްﷲގެ ތަނަވަސް ރަޙްމަތް މިންވަރުކުރައްވައި، ސުވަރުގޭގެ ދާއިމީ ނިޢުމަތް ދެއްވުން އެދި ދުޢާކުރަން،“ ރައީސްގެ މެސެޖުގައި ވިދާޅުވެފައިވެއެވެ.
އައިންތު މިސްއަކީ ތައުލީމީ ދާއިރާގައި 30 އަހަރަށްވުރެ ގިނަ ދުވަހު އަގުނުކުރެވޭފަދަ ހިދުމަތްތަކެއް ކުރެއްވި ބޭފުޅެކެވެ. އޭނާ އެންމެ ގިނަ ދުވަހު ހިދުމަތް ކުރެއްވީ އަމީނިއްޔާ ސްކޫލުގެ ދިވެހި މުދައްރިސެއްގެ ގޮތުގައެވެ.
ތައުލީމީ ދާއިރާގެ އިތުރުން، އައިންތު މިސް ވަނީ ސިޔާސީ ދާއިރާއަށްވެސް ނުކުންވުމަށް މަސައްކަތް ކުރަށްވާފައެވެ. އެގޮތުން 20 ވަނަ ރައްޔިތުންގެ މަޖިލީހުގެ އިންތިހާބުގައި މާފަންނު މެދު ދާއިރާއަށް އަމިއްލަ ގޮތުން ވާދަކުރެއްވިއެވެ. އިންތިހާބުގެ ކެމްޕޭނުގައި އޭނާ ވަނީ މަސައްކަތްތެރިންނަށް ހަތަރު ދުވަހު މަސައްކަތްކޮށްފައި ތިން ދުވަހު ޗުއްޓީ ލިބޭނެ އުސޫލެއް ގާއިމުކުރުމަށް ވަރުގަދަ އެޖެންޑާއަކާއެކު ވަކާލާތު ކުރައްވާފައެވެ.
އައިންތު މިސްގެ ވަކިވުމަކީ ރާއްޖޭގެ ތައުލީމީ ދާއިރާއަށް ލިބުނު ބޮޑު އުނިކަމެއްގެ ގޮތުގައި ގިނަ ބަޔަކު ސިފަކުރެއެވެ. އޭނާ ދޫކުރެއްވި އިލްމީ ތަރުބިއްޔަތާއި ބަހަށް ހުރި ލޯތްބަކީ ދަރިވަރުންގެ ހިތްތަކުގައި އަބަދުވެސް ބިންވަޅު ނެގިފައި ހުންނާނެ ހަނދާންތަކެކެވެ.