ދޮޅު ބިލިއަނަށް ވުރެ ގިނަ ރުފިޔާއަށް 14 ރަށެއްގައި އުމްރާނީ މަޝްރޫއުތަކެއް ހިންގުމަށް، ކޮންސްޓްރަކްޝަން މިނިސްޓްރީން އެމްޓީސީސީއާ މިއަދު ހަވާލުކޮށްފިއެވެ.
މި މަޝްރޫއުތައް އެމްޓީސީސީއާ ހަވާލުކޮށް އެކަމާ ގުޅޭ އެއްބަސްވުންތަކުގައި ކޮންސްޓްރަކްޝަން މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު އިސްމާޢީލް ޙަމީދެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަޙްމަދު ސަޢުދީއެވެ.
އެމްޓީސީސީއާ ސަރުކާރުން ހަވާލުކުރި މަޝްރޫއުތަކުގެ ތެރޭގައި ހއ. އިހަވަންދޫގައި އާޓިފިޝަލް ބީޗެއް ތަރައްގީކުރުމަށާއި ގދ. ފަރެސްމާތޮޑާގެ މަގު ހެދުމުގެ މަޝްރޫއުގެ ދެވަނަ ފިޔަވަހީގެ މަސައްކަތްތައް ކުރިއަށް ގެންދިއުން ހިމެނޭހެން ދެ ރަށެއްގައި ބަނދަރު ތަރައްގީކުރުމަށާއި، ހަތް ރަށެއްގެ ބިން ހިއްކައި ގޮނޑުދޮށް ހިމާޔަތްކުރުމަށާއި، ތިން ރަށެއްގެ ގޮނޑުދޮށް ހިމާޔަތްކުރުމުގެ މަޝްރޫއު ހިމެނެއެވެ.
މީގެއިތުރުން ހއ. މުރައިދުއާއި ރ. އުނގޫފާރުގައި ބަނދަރު ހެދުމަށާއި ހއ. ފިއްލަދުއާއި ނ. މާފަރާއި ކ. ގާފަރުގައި ގޮނޑުދޮށް ހިމާޔަތްކުރުމުގެ މަޝްރޫއު އާއި ހއ. ވަށަފަރާއި، ނ. ހެނބަދުއާއި އެ އަތޮޅުގެ މާޅެންދުއާއި ހޮޅުދުއާއި ރ. އަލިފުށްޓާއި ދ. ބަނޑިދުއާއި ގއ. ކަނޑުހުޅުދޫގައި ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއު ވެސް ހަވާލުކުރިއެވެ.
މި މަޝްރޫއުތަކުގެ އަގު 1.67 ބިލިއަން ރުފިޔާއަށް އަރައެވެ. :
ހއ. މުރައިދޫގެ ބަނދަރު ތަރައްގީކުރުން – 54.8 މިލިއަން ރުފިޔާ
ރ. އުނގޫފާރުގެ ބަނދަރު ތަރައްގީކުރުން – 139.73 މިލިއަން ރުފިޔާ
ހއ. ފިއްލަދޫގެ ގޮނޑުދޮށް ހިމާޔަތްކުރުން – 24.07 މިލިއަން ރުފިޔާ
ނ. މާފަރުގެ ގޮނޑުދޮށް ހިމާޔަތްކުރުން – 63.35 މިލިއަން ރުފިޔާ
ކ. ގާފަރުގެ ގޮނޑުދޮށް ހިމާޔަތްކުރުން – 64.3 މިލިއަން ރުފިޔާ
ހއ. ވަށަފަރުގެ ބިން ހިއްކުމާއި ގޮނޑުދޮށް ހިމާޔަތްކުރުން – 242.65 މިލިއަން ރުފިޔާ
ނ. ހެނބަދޫގެ ބިން ހިއްކުމާއި ގޮނޑުދޮށް ހިމާޔަތްކުރުން – 91.94 މިލިއަން ރުފިޔާ
ނ. މާޅެންދޫގެ ބިން ހިއްކުމާއި ގޮނޑުދޮށް ހިމާޔަތްކުރުން – 63.62 މިލިއަން ރުފިޔާ
ނ. ހޮޅުދޫގެ ބިން ހިއްކުމާއި ގޮނޑުދޮށް ހިމާޔަތްކުރުން – 103.28 މިލިއަން ރުފިޔާ
ރ. އަލިފުށިގެ ބިން ހިއްކުމާއި ގޮނޑުދޮށް ހިމާޔަތްކުރުން – 106.14 މިލިއަން ރުފިޔާ
ދ. ބަނޑިދޫގެ ބިން ހިއްކުމާއި ގޮނޑުދޮށް ހިމާޔަތްކުރުން – 221.95 މިލިއަން ރުފިޔާ
ގއ. ކަނޑުހުޅުދޫގެ ބިން ހިއްކުމާއި ގޮނޑުދޮށް ހިމާޔަތްކުރުން – 183.77 މިލިއަން ރުފިޔާ
ހއ. އިހަވަންދޫގެ އާޓިފިޝަލް ބީޗު ހެދުން – 54.8 މިލިއަން ރުފިޔާ
ގދ. ފަރެސްމާތޮޑާގެ މަގު ހެދުން (ދެވަނަ ފިޔަވަހި) – 255.21 މިލިއަން ރުފިޔާ