ރާއްޖެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދުމަށްޓަކައި ސަރުކާރުން ކުރިއަށްގެންދާ ރަސްމާލެ ހިއްކުމުގެ މަސައްކަތުގެ ތެރެއިން ސައިޓް އޭ ގެ 56 ހެކްޓަރު ހިއްކައި ނިމިއްޖެއެވެ.
އެމްއޭސީއެލް އިން ބުނީ މިހާރު އެ ސައިޓުގެ ”އޭރިއާ އޭ“ އިން ހިއްކުމަށް ހަމަޖެހިފައިވާ 137.5 ހެކްޓަރުގެ ތެރެއިން 56 ހެކްޓަރު ނިމިފައިވާ ކަމަށެވެ. އަދި އެ ސައިޓުގެ 41 އިންސައްތަ މަސައްކަތް ނިމިފައިވާ ކަމަށް ވެސް އެ ކުންފުނިން ބުންޏެވެ.
ރަސްމާލެ ހިއްކުމަށް ގެނެސްފައި ވަނީ ދުނިޔޭގެ އެންމެ ބޮޑު އެއް ޑްރެޖަރެވެ. ދެ ޑްރެޖަރު ބޭނުންކޮށްގެން ރަސްމާލެ ހިއްކުމުގެ ދުވެލި ވަނީ އެތައް ގުނައެއް ހަލުވިކޮށްފައެވެ.
އެމްއޭސީއެލް އިން މަސައްކަތް ކުރަނީ އަންނަ އޭޕްރީލް މަހުގެ ނިޔަލަށް ރަސްމާލެ ހިއްކުމުގެ މަސައްކަތް ނިންމާލުމަށެވެ.
ރަސްމާލޭގެ ބިން ހިއްކަމުންދަނީ 12 ސަރަޙައްދަކަށް ބާހާލައިގެންނެވެ. މި މަޝްރޫޢުގެ ދަށުން 1009 ހެކްޓަރު ހިއްކުމަށްވަނީ ހަމަޖެހިފައެވެ.
ރަސްމާލެއިން ޖުމްލަ 25،000 ގޯތި ދޫކުރަން ރައީސް ޑރ. މުހައްމަދު މުއިއްޒު ވަނީ ނިންމަވާފައެވެ.