އިލެކްޝަންސް ކޮމިޝަނުން ރޭ އާންމުކުރި ތަފާސްހިސާބުތަކުން ދައްކާ ގޮތުގައި ވެރިކަންކުރާ ޕީއެންސީގެ މެންބަރުންގެ އަދަދު 74،048 އަށް އަރައިފައިވެއެވެ.
ޖޫން މަހުގެ 29 ވަނަ ދުވަހު އެ ޕާޓީގައި 68،665 މެންބަރުން ތިބި ނަމަވެސް، ހަ މަސްދުވަހުގެ ތެރޭގައި 5،383 މެންބަރުން އިތުރުވެފައިވާ ކަމަށް ތަފާސްހިސާބުތަކުން ހާމަވެއެވެ.
އެމްޑީޕީގެ މެންބަރުންގެ އަދަދު 43،765 އިން 43،784 އަށް އަދި އެމްޑީއޭގެ މެންބަރުން 9،011 އިން 9،686 އަށް އިތުރުވި ނަމަވެސް، އަދާލަތު ޕާޓީ، ޖުމްހޫރީ ޕާޓީ، އެމްއެންޕީ އަދި ޕީއެންއެފް އިން މެންބަރުން މަދުވެފައިވެއެވެ. އަދާލަތު ޕާޓީއިން 577، ޖުމްހޫރީ ޕާޓީއިން 1،113، އެމްއެންޕީއިން 703 އަދި ޕީއެންއެފް އިން 34 މެންބަރުން މަދުވެފައިވެއެވެ. ރައީސް ނަޝީދާއި އެމަނިކުފާނަށް ތާއީދުކުރައްވާ މެންބަރުން އެމްޑީޕީއާ ގުޅިވަޑައިގެންނެވިއިރު، ދަ ޑިމޮކްރެޓްސްގެ މެންބަރުން 3،547 އިން 2،952 އަށް ދަށްވެފައިވެއެވެ.
ޕީޕީއެމް މިދިޔަ އަހަރުގެ ޖަނަވަރީ މަހު އުވާލުމަށް ފަހު ޕީއެންސީން އެއް ލައްކަ މެންބަރުން ހަމަކުރުމުގެ އަމާޒުގައި ގިނަ މަސައްކަތްތަކެއް ކުރަމުން އަންނައިރު، ސިޔާސީ ޕާޓީތަކަށް ވަގަށް މީހުން ވައްދާ މައްސަލަ ބޮޑުވެ އެ ޕާޓީއަށް ވެސް ތުހުމަތުތަކެއް އަމާޒުވެފައިވެއެވެ. ޑީއެންއާރު އިމާރާތު ތެރޭގައި ޕީއެންސީއަށް ފޯމުފުރި މައްސަލައެއް ފެންމަތިވެ، ފޮޓޯތަކެއް މީސްމީޑިއާގައި ލީކުވިއިރު، ހޯމް މިނިސްޓަރު އަލީ އިހުސާން ވިދާޅުވީ ނުފޫޒު ފޯރުވައިގެން މީހުން ވައްދައިފައިނުވާނެ ކަމަށާއި، އެފަދަ ކަމެއް ކުރިނަމަ އެ ޕާޓީގައި މިހާރު 90،000 އަށްވުރެ ގިނަ މީހުން ތިބޭނެ ކަމަށެވެ.