ރާއްޖޭގައި 3،000 އަށްވުރެ ގިނަ މީހުން ދިރިއުޅޭ ރަށްރަށުގައި އެސްޓީއޯގެ ފިހާރަތައް ހުޅުވައި، އަސާސީ 23 ބާވަތެއް ސީދާ އެސްޓީއޯ މެދުވެރިކޮށް ލިބޭނެ އިންތިޒާމު ހަމަޖެއްސުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފިއެވެ.
މިކަން ހާމަކުރެއްވީ އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓަރު މުހައްމަދު ސައީދުއެވެ.
މިނިސްޓަރު ސައީދު ވިދާޅުވީ، 3،000 އިން މަތީގެ އާބާދީތަކަށް އެސްޓީއޯގެ ފިހާރަތައް މެދުވެރިކޮށް މުދާ ފޯރުކޮށްދޭއިރު، އާބާދީގައި 3،000 މީހުން ހަމަނުވާ ރަށްރަށުގައި އެސްޓީއޯގެ އޭޖެންޓުން މެދުވެރިކޮށް މި 23 ބާވަތް ލިބޭނެކަން ކަށަވަރުކުރާނެ ކަމަށެވެ. މި މަސައްކަތް މިހާރު އެސްޓީއޯއާއި އިކޮނޮމިކް މިނިސްޓްރީ ގުޅިގެން ބާރުސްޕީޑުގައި ކުރިއަށްދާކަން މިނިސްޓަރު ފާހަގަކުރެއްވި އެވެ.
މީގެ އިތުރުން މާލޭގައި މިހާރުވެސް އަތޮޅު ފިހާރަތަކާއި ދިމާލުން އެސްޓީއޯގެ ހޯލްސޭލް ސެންޓަރެއް ގާއިމުކޮށްފައިވާކަން މިނިސްޓަރު ފާހަގަކުރެއްވި އެވެ. އަދި ކުރިއަށް އޮތް ރަމަޟާން މަސް އަންނައިރު ހުޅުމާލޭގައިވެސް މިފަދަ ވަސީލަތްތައް ގާއިމުވެގެންދާނެ ކަމަށާއި، އައްޑޫ ސިޓީ، ކުޅުދުއްފުށި ސިޓީ އަދި ތިނަދޫ ސިޓީ ފަދަ ބޮޑެތި އާބާދީތަކުގައިވެސް އެސްޓީއޯގެ ސެންޓަރުތައް މެދުވެރިކޮށް މުދާ ލިބޭނެ އިންތިޒާމު ހަމަޖައްސަމުންދާ ކަމަށް މިނިސްޓަރު ސައީދު ވިދާޅުވި އެވެ.
ތަފާސްހިސާބުތަކަށް އަލިއަޅުއްވާލައްވަމުން މިނިސްޓަރު ވިދާޅުވީ، ރާއްޖޭގައި ފުރަތަމަ ފަހަރަށް ގާއިމުކުރި ’އެސެންޝަލް ކޮމޯޑިޓީ ޕްރައިސް އިންޑެކްސް‘ އިން ދައްކާ ގޮތުގައި، އަސާސީ ބާވަތްތަކުގެ އަގުތައް މިހާރު ވަނީ ވަރަށް ބޮޑަށް ތިރިކުރެވިފަ އެވެ.
”މިއީ ނެޝަނަލް ބިއުރޯ އޮފް ސްޓެޓިސްޓިކްސްގެ ޑޭޓާ. އެ ބޭފުޅުން ޕަބްލިޝްކޮށްފައިވާ އިންޑެކްސްއަށް ބަލާއިރު، ޖުލައި މަހާ އަޅާބަލާއިރު އޮކްޓޫބަރު އަދި ނޮވެމްބަރު މަހުގެ ނިޔަލަށް އަގުތައް ވަނީ ވަރަށް ބޮޑުތަނުން ތިރިކުރެވިފައި،“
މާލޭގެ ވިޔަފާރި ބަނދަރާއި ދިމާލު މަގަށް ގެނެވުނު ބަދަލުތަކާ ގުޅޭގޮތުން މިނިސްޓަރު ވިދާޅުވީ، ރައީސްގެ ހާއްސަ އިރުޝާދުގެ ދަށުން ކުރިއަށްގެންދިޔަ މަޝްރޫގެ ސަބަބުން މިހާރު އެ ސަރަހައްދު ވަރަށް ބޮޑަށް ތަރުތީބު ކުރެވިފައިވާ ކަމަށާއި މުދާ އުފުލުމުގައި ލުއިފަސޭހަ ވެގެންދާނެ ކަމަށެވެ. އެގޮތުން މެއިން ޖެޓީއާ ދިމާލުން ރަމަޟާން މަހަށް ފަސޭހަކަމާއެކު މުދާ އަރުވާ ބޭލޭނެ އިންތިޒާމު މިހާރު ހަމަޖެހިފައިވާކަމަށް މިނިސްޓަރު ވިދާޅުވިއެވެ.