ސަރުކާރަށް ކޮންމެ މަހަކު 4،984 ރުފިޔާ ދައްކަންޖެހޭގޮތަށް ދޫކޮށްފައިވާ ހިޔާ ފްލެޓްގެ ދެ ކޮޓަރީގެ އެޕާޓްމަންޓެއް 21،000 ރުފިޔާ އަށް ކުއްޔަށް ދޫކުރަން އިއުލާންކޮށްފިއެވެ.
ހިޔާ ފްލެޓަށް ދައްކަންޖެހޭ ކުލި ސަރުކާރުން ވަނީ ދެ ފަހަރަށް ކުޑަކޮށްފައެވެ. އެ ފްލެޓްތަކަށް ދައްކަންޖެހޭ ކުލީގެ އަދަދު 5000 ރުފިޔާއަށް ވެސް ނާރަ އެވެ. ސަރުކާރުން ދާދިފަހުން ވަނީ ހިޔާ ފްލެޓްގެ ކުލި ނުދެއްކުމުން އަރާފައިވާ ޖޫރިމަނާތައް ވެސް މާފްކޮށްދީފައެވެ.
އަސާސީ ބޯހިޔާވަހިކަން ހޯދާނެ ތަނަވަސްކަމެއް ނެތް މީހުންނަށް ސަރުކާރުން ދީފައިވާ ހިޔާ ފްލެޓެއް އާދަޔާ ޚިލާފު ބޮޑު އަގެއްގައި ކުއްޔަށްދޭން އިއުލާންކުރުމުން ސޯޝަލް މީޑިއާގައި ގިނަ ބަޔަކު ވަނީ އެކަމަށް ފާޑުކިޔާފަ އެވެ.
މިފަދަ ފަރާތްތަކާ މެދު ފިޔަވަޅު އެޅުމަށް ސޯޝަލް މީޑިއާގައި އަންނަނީ ގޮވާލަމުންނެވެ.
މާލޭގައި ބޮޑު ކުއްޔަކަށް އުޅޭނެ ފެންވަރު ނެތިގެން ކުޑަ އަގެއްގައި އުޅޭނެ ގޮތެއް ސަރުކާރުން ހޯދައިދިނުމުން ވެސް އެތަން ބޮޑު އަގުގައި ކުއްޔަށް ދޫކުރުމަކީ ބަލައިގަނެވޭނެ ކަމެއް ނޫން ކަމަށް ބައެއް ފަރާތްތަކުން ބުންޏެވެ. އަދި އެފަދަ މީހުންނަށް މަކަރާއި ހީލަތުން ފްލެޓް ހޯދިކަމުގެ ޖިނާއީ ދައުވާ ކުރެވޭނެގޮތަށް ގާނޫނު އިސްލާހު ކުރަންޖެހޭ ކަމަށް ބައެއް ފަރާތްތަކުން އަންނަނީ ބުނަމުންނެވެ.