ރާއްޖޭގައި ޑެންގީ ހުން އިތުރުވަމުން އަންނާތީ، ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.
އެޗްޕީއޭއިން ބުނީ ޑެންގީ ހުން ފެތުރޭ މިންވަރު އިތުރުވަމުން އަންނަކަން އެ އެޖެންސީއަށް ފާހަގަ ކުރެވިފައިވާ ކަމަށެވެ. އެހެންކަމުން މަދިރީގެ ކިބައިން ރައްކާތެރިވުމާއި، މަދިރި މަދުކުރުމަށް ކުރެވެން ހުރި މަސައްކަތްތައް ކުރުމަށް ވަނީ އިލްތިމާސްކޮށްފައެވެ.
ޑެންގީ ހުން ފެތުރެނީ، އެ ބަލި ޖެހިފައިވާ މީހެއްގެ ގައިގައި އީޑީސް މަދިރި ހެފުމަށް ފަހު، ގޮސް އެހެން މީހުންގެ ގައިގައި ހެފުމުންނެވެ.
މިދިޔަ އޮކްޓޯބަރު މަހުން ފެށިގެން ޑެންގީގެ 4،400 އަށް ވުރެ ގިނަ ކޭސް ވަނީ ރިޕޯޓް ކޮށްފައެވެ. އަދި އޭގެ ކުރިން ޖުލައި މަހު ޑެންގީ ހުން ޖެހިގެން ރިޕޯޓު ކުރި މީހުންގެ އަދަދު ވަނީ 194 ކަށް އަރާފައެވެ.
މިއަހަރުގެ ޖޫން މަހާއި އަޅާ ބަލާއިރު، ސެޕްޓެމްބަރު މަހު ޑެންގީ ހުން ޖެހިގެން 20 ކޭސް އިތުރަށް ރިޕޯޓުކޮށްފައިވާ ކަމަށް ވެސް އެޗްޕީއޭ އިން ބުންޏެވެ.
އެޗްޕީއޭއިން ބުނީ ރާއްޖޭގެ ހުރިހާ އަތޮޅެއްގައި ވެސް ޑެންގީ ހުން އިތުރުވެފައިވާ ކަމަށެވެ. އަދި މި އަހަރުގެ ސެޕްޓެމްބަރު މަހު ޑެންގީ ހުން ޖެހިގެން 260 މީހަކު ރިޕޯޓުކުރިއެވެ. އެކަމަކު، އޮކްޓޫބަރު މަހު އެ އަދަދު ހުރީ، 342 އަށް އިތުރުވެފައެވެ. އަދި މިއީ، މިދިޔަ އަހަރުގެ މި މުއްދަތުގައި ރިޕޯޓުކުރި މިންވަރަށްވުރެ، އިތުރު އަދަދެކެވެ.
ޑެންގީ ހުން ޖެހިއްޖެނަމަ ގިނައިން އަރާމު ކުރުމާއެކު ދިޔާ ތަކެތި ބުއިން އިތުރުކުރުމަށް އެޗްޕީއޭ އިން އިރުޝާދުދެއެވެ. އަދި ހަށިގަނޑަށް ފައިދާ ހުރި ކާނާ ބޭނުންކުރުމަށް ސަމާލުކަން ދިނުމާއެކު ހުން މަޑުކުރުމަށާއި ގައިގެ ރިހުމަށް ޕެނެޑޯލް ނުވަތަ ޕެރެސެޓްމޯލް ފިޔަވާ އިތުރު ބޭސްތައް ބޭނުން ނުކުރުމަށްވެސް ވަނީ އިލްތިމާސް ކޮށްފައެވެ.
މަދިރިން ރައްކާތެރިވުމަށްޓަކައި މަދިރި ލޯޝަން ނުވަތަ ސްޕްރޭ ބޭނުން ކުރުމަށާއި، މަދިރި ގޭތެރެއަށް ވަނުން މަދުކުރުމަށް ކުޑަދޮރު އަދި ޖޯލިފަދަ ތަންތަނުގައި މަދިރި ދާ ޖެހުމަށް ވަނީ އެދިފައެވެ. އަދި މީގެ އިތުރުން މަދިރި އާންމުކޮށް ގިނަވާ ވަގުތުތަކުގައި ދޮރުތައް ލައްޕާފައި ބެހެއްޓުމަށް ވެސް އިލްތިމާސް ކޮށްފައިވެއެވެ.
އެ އެޖެންސީން އިތުރަށް ބުނީ ޑެންގީ ފަތުރާ އީޑީސް މަދިރި، ސާފު ފެން ހަރުލާ ކޮންމެ ތަނެއްގައި އާލާވާނޭ ކަމަށެވެ. އަދި މިފަދަ ފެން ހަރުލާފައި ހުންނަ ތަކެތިން ފެން ހުސް ކުރިޔަސް މަދިރި ބިސް، އެ ތަކެތީގައި ހަރުލައި، ހަލާކުނުވެ ހަ މަސް ވަންދެން ހުންނަކަމަށް ބުންޏެވެ.