މިހާރު މާލޭގައި ކުރިއަށްދާ ކާވާ ވިމެންސް ކަޕް 2025 ގައި ރާއްޖޭގެ ޤައުމީ އަންހެން ވޮލީ ޓީމުން ކުޅުނު ފުރަތަމަ މެޗުގައި ބަންގްލަދޭޝް އާއި ވާދަކޮށް ފަސޭހަ ކަމާއެކު ސީދާ ތިން ސެޓުން މޮޅުވެ ރާއްޖޭ އިން މުބާރާތުގެ ފެށުން ރަނގަޅުކޮށްފިއެވެ.
ސޯސަލް ސެންޓަރުގެ އިންޑޯ ކޯޓުގައި ކުޅުނު މިމެޗުގެ ފުރަތަމަ ސެޓް ވާދަވެރި ކުޅުމަކަށްފަހު ހަތް ޕޮއިންޓްގެ ލީޑަކާއެކު 18-25 ގެ ނަތީޖާއަކުން ދިވެހި ޓީމު ކާމިޔާބުކުރިއިރު، ދެވަނަ ސެޓުގައި ދިވެހި ޓީމުގެ ފަރާތުން ވަނީ ތަފާތު މޮޅު ކުޅުމެއް ފެނިގެންގޮސްފައެވެ.
އެގޮތުން މެޗުގެ ދެވަނަ ސެޓް 13 ޕޮއިންޓްގެ ބޮޑު ލީޑަކާއެކު 12-25 ގެ ތަފާތުބޮޑު ނަތީޖާއަކުން ދިވެހި ޓީމު ކާމިޔާބުކުރިއިރު، މެޗުގެ ތިންވަނަ ސެޓް ރާއްޖެ އިން ކާމިޔާބުކުރީ ނުވާ ޕޮއިންޓްގެ ލީޑަކާއެކު 16-25 ގެ ނަތީޖާއަކުންނެވެ.
ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ކަޕްގެ ކުޅުން މިއަދު ރާއްޖޭގައި ފަށާފައިވާއިރު، މި މުބާރާތުގައި ހަތަރު ގައުމަކުން އަންނަނީ ވާދަކުރަމުންނެވެ. އަދި އޭގެ ތެރޭގައި ރާއްޖޭގެ އިތުރުން ދެން ހިމެނެނީ ބަންގްލަދޭޝް، އަފްގާނިސްތާން އަދި ކިރްގިސްތާންއެވެ.
މި މުބާރާތުގައި މިއަދު ދެމެޗު ކުޅުމަށް ހަމަޖެހިފައިވާއިރު، ހަވީރު ކުޅޭ ފުރަތަމަ މެޗުގައި ބަންގްލަދޭޝް އާއި ކިރްގިސްތާން ވާދަ ކުރާއިރު، މި މުބާރާތުގައި ރާއްޖޭން ކުޅޭ ދެވަނަ މެޗުގައި މިރޭ ނިކުންނާނީ އަފްގާނިސްތާން އާއި ދެކޮޅަށެވެ. މި މެޗު ފަށާނީ މިރޭ 20:15 ގައެވެ.