މާލެ ސަރަހައްދުގެ ވައި ނުރައްކާތެރި މިންވަރަށް ނުސާފުވުމުން، އެޗްޕީއޭއިން އޮރެންޖު އެލާޓް ނެރެފިއެވެ.
އެޗްޕީއޭ އިން ބުނީ ވައި ނުސާފުވުމުން ނާޒުކު ހާލަތުގައި ތިބި މީހުންނާއި އެހެން މީހުންނަށް ވެސް ނޭވާލާ ނިޒާމުގެ ބަލިތައް ޖެހުމުގެ ފުރުސަތު ބޮޑު ކަމަށެވެ. އެހެންވެ، އެ ފަދަ ހާލަތުގައި ތިބި މީހުން ބޭރުގައި ކަސްރަތުކުރުން ފަދަ ކަންކަން މަޑުޖައްސާލަން ވަނީ އެދިފައެވެ.
އެޗްޕީއޭއިން ވަނީ ނާޒުކު ހާލަތުގައި ތިބި މީހުން ބޭރަށް ނުކުންނައިރު އެން95 މާސްކު ބޭނުންކުރުމާއި ބޭރުގެ ނުސާފު ވައި ނުވަންނަ ގޮތަށް ގޭގެ ދޮރުތައް ލައްޕަން އަދި އެއާ ޕިއުރިފަޔާ ބޭނުންކުރަން ވަނީ އެދިފައެވެ.
ކުޑަކުދިން ގޮވައިގެން ހަވީރު ބޭރަށް ދިޔުން ހުއްޓާލުމަކީ އެކުދިންގެ ސިއްހަތަށްޓަކައި އެޅޭނެ މުހިންމު ފިޔަވަޅެކެވެ. ރަނގަޅު ސިއްހަތެއްގައި ތިބި މީހުންނަށް ވެސް މިކަމުގެ ނުރައްކާ އެބައޮތެވެ. އެހެންވެ، އެޗްޕީއޭގެ މި އިރުޝާދަށް ތަބާވުމަކީ ލާޒިމު ކަމެކެވެ.
މާދަމާއިން ފެށިގެން އަންނަ ހޯމަ ދުވަހާ ހަމައަށް މިއަށް ވުރެ ގޯސްވާނެ ކަމަށް ވަނީ ލަފާކޮށްފައިވެއެވެ.
ކޮންމެ އަހަރެއްގެ ހުޅަނގުމޫސުން ނިމި އިރުވައި މޫސުން ފެށޭ ދުވަސްވަރު ރާއްޖޭގެ ވައި އާންމުކޮށް ނުސާފުވެ އެވެ.
މޫސުން ދިރާސާކުރާ އިދާރާތަކުން ބުނާ ގޮތުގައި މި މޫސުމުގައި ރާއްޖޭގެ ވައި ނުސާފުވަނީ އިންޑިއާ އާއި ޕާކިސްތާން އަދި ޗައިނާ ހިއްސާކުރާ ފަރުބަދަ ޗޭނު ”ހިމާލަޔާސް“ އަށް ޖެހޭ ވައި ރާއްޖެއާ ދިމާލަށް ދަތުރުކުރާތީއެވެ.