ސިވިލް ސާވިސް މުވައްޒަފުންގެ މުސާރަތަކަށް ނޮވެމްބަރު 1 އިން ފެށިގެން ގެންނަ ބަދަލުތަކާއެކު، ސަރުކާރުގެ ޖޮބް މެޓްރިކްސް އާންމުކޮށްފިއެވެ.
މި ބަދަލުތައް އާންމުކޮށްފައިވަނީ ފިނޭންސް މިނިސްޓްރީގެ ވެބްސައިޓުގައިވާ ޖޮބް މެޓްރިކްސްގެ ތެރެއިންނެވެ. މިއީ ސިވިލް ސާވިސް މުވައްޒަފުންގެ މުސާރަ ބޮޑުނުވާތާ ގިނަ ދުވަސްތަކަކަށްފަހު ގެނެވޭ ބަދަލެކެވެ.
އާންމުކުރި ޖޮބް މެޓްރިކްސްގައި ތަފާތު އެކި ދާއިރާތަކުގައި މަސައްކަތް ކުރާ މީހުންގެ މުސާރަތަކަށް ގެންނަ ބަދަލުތައް ވަނީ ހިމަނާފައެވެ. އޭގެތެރޭގައި ވިޔަފާރި އާއި އެޑްމިނިސްޓްރޭޓިވް ދާއިރާ، އިންފޮމޭޝަން އެންޑް ކޮމިއުނިކޭޝަންސް ދާއިރާ، ލީގަލް އަދި ކަލްޗާގެ ދާއިރާގެ އިތުރުން ސަލާމަތީ ހިދުމަތްތަކުގައި މަސައްކަތް ކުރާ މުވައްޒަފުން އަދި ފަންނީ ދާއިރާތަކުގައި މަސައްކަތް ކުރާ މުވައްޒަފުންގެ މުސާރައަށް އަންނަ ބަދަލުތައް ހިމެނެއެވެ
https://www.finance.gov.mv/national-pay-commission/job-matrices
މި ބަދަލުތަކުގެ ތެރޭގައި ހިމެނޭ މުވައްޒަފުންގެ ތެރޭގައި އެކައުންޓެންޓުންނާއި ފިސްކަލް އެނަލިސްޓުންނާއި ލޯކަލް ކައުންސިލްތަކުގައި މަސައްކަތް ކުރާ އިދާރީ މުވައްޒަފުންނާއި އާކިއޮލޮޖިސްޓުންނާއި އިކޮނޮމިސްޓުންގެ އިތުރުން މީޑިއާ ކޮމިޝަނުގައި މަސައްކަތް ކުރާ މުވައްޒަފުން ހިމެނެ އެވެ. އަދި އަލިފާން ނިއްވުމުގައި ހަރަކާތްތެރިވާ ސިފައިންނާއި އޭވިއޭޝަން ކޮމާންޑުގައި މަސައްކަތް ކުރާ މުވައްޒަފުންގެ މުސާރަތަކަށް ގެންނަ ބަދަލުތައްވެސް މި މެޓްރިކްސްގައި ހިމަނާފައިވެއެވެ.
ސަރުކާރު މުވައްޒަފުންތަކެއްގެ މުސާރަ ބޮޑުވެގެންދާނެކަން ރައީސް ޑރ. މުހައްމަދު މުއިއްޒު ވަނީ މި އަހަރުގެ ސެޕްޓެމްބަރު 28 ގައި ވިދާޅުވެފަ އެވެ. އެކްސްގައި ކުރެއްވި ޕޯސްޓެއްގައި ޑރ. މުއިއްޒު ވިދާޅުވީ، މުސާރަ ބޮޑުކުރަނީ ހުރިހާ މަގާމެއްގެ މުސާރަ އެއްހަމަކުރުމުގެ ގޮތުންނެވެ. މީގެ އިތުރުން، ސިވިލް ސާވިސް މުވައްޒަފުންގެ އިތުރުން، މި އަހަރު މުސާރަ ބޮޑުނުވާ ހުރިހާ މުއައްސަސާތަކެއްގެ މުވައްޒަފުންގެ މުސާރަ އަންނަ އަހަރު ބޮޑުވާނެ ކަމަށް ވެސް ރައީސް ވަނީ ވިދާޅުވެފައެވެ.