ތުރުކީވިލާތުން ދިވެހިރާއްޖެއަށް ހަދިޔާކުރި މަނަވަރު ވެގެންދާނީ ދިވެހި އަސްކަރިއްޔާގެ ކަނޑުމަތީގެ ލަޝްކަރީގެ ބާރު އެތައް ގުނައެއް އިތުރުކުރާނެ މަނަވަރަކަށްކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީ ވިދާޅުވެއްޖެއެވެ.
ތުރުކީން ރާއްޖެއަށް ހަދިޔާކުރި މަނަވަރު ޤައުމީ ދިފާޢީ ބާރާ ޙަވާލުކުރުމާއި ކޮމިޝަން ކުރުމުގެ ރަސްމިއްޔާތުގައި ވާހަކަ ދައްކަވަމުން ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީ ވިދާޅުވީ، މިމަނަވަރު ވެގެންދާނީ ދިވެހި އަސްކަރިއްޔާގެ އަރުމާދަށް އިތުރުކުރެވިގެންދާ އެންމެ ބޮޑު އުޅަނދަށްކަމަށެވެ. އަދި މިމަނަވަރު ވެގެންދާނީ، ދިވެހި އަސްކަރިއްޔާގެ ކަނޑުމަތީގެ ލަޝްކަރީގެ ބާރު އެތައް ގުނައެއް އިތުރުކުރާނެ މަނަވަރަކަށްކަމަށްވެސް ވިދާޅުވިއެވެ.
ދިވެހިރާއްޖޭގެ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ، ޑރ.މުޙައްމަދު މުޢިއްޒު، ދިވެހި އަސްކަރިއްޔާ ތަރައްޤީކުރެއްވުމަށް ޚާއްސަ އަހައްމިއްޔަތުކަމެއް ދެއްވާކަން ފާހަގަކުރައްވާ ޙިލްމީ ވިދާޅުވީ، ކައިރި މުސްތަޤްބަލެއްގައި ކަނޑުގެ އަސްކަރީ އިތުރު އުޅަނދުފަހަރު ރާއްޖެ ގެނައުމުގެ މަސައްކަތް ކުރައްވަމުން ގެންދަވާކަމަށެވެ.
”ތުރުކީވިލާތު ނޭވީގެ މަނަވަރެއް ދިވެހިރާއްޖޭގެ ޤައުމީ ދިފާޢީ ބާރަށް ހޯއްދަވާދެއްވާ ދިވެހި ކަނޑުތައް ބެލެހެއްޓުމުގެ ޤާބިލުކަން ހޯއްދަވާ ދެއްވުމަށްޓަކައި ކައިރި މުސްތަޤްބަލެއްގައި އިތުރު އަސްކަރީ ކަނޑުގެ އުޅަނދުފަހަރު އެމަނިކުފާނު އެމްއެންޑީއެފަށް ހޯއްދަވާދެއްވާނެ. މިއީ އަސްކަރިއްޔާ ތަރައްޤީކުރެއްވުމަށް އެމަނިކުފާނު ވެވަޑައިގެންފައިވާ ވަޢުދުފުޅުތައް ފުއްދަވަމުން ގެންދަވާކަމުގެ އަލިގަދަ ހެއްކެއް“. ޗީފް އޮފް ޑިފެންސް ފޯސް އިބްރާހީމް ޙިލްމީ ވިދާޅުވިއެވެ.
ޗީފް އޮފް ޑިފެންސް ފޯސްގެ ވާހަކައިގައި ރާއްޖޭގެ މިނިވަންކަމުގެ އެންމެ ވަރުގަދަ ރަމްޒަކީ ދިވެހިރާއްޖޭގެ އަސްކަރިއްޔާކަން ފާހަގަކުރައްވާ މިނިވަންކަން ދިފާޢުކުރުމުގައި ހަށިގަނޑާއި ފުރާނައިން ޤުރުބާންވުމަށް ސިފައިން އަބަދުވެސް ތިބޭނީ ތައްޔާރަށްކަމަށް ވިދާޅުވިއެވެ.