ބ. އޭދަފުށީ ބަނދަރު ތަރައްގީކުރުމުގެ މަޝްރޫއުގެ 35 އިންސަންތަ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީން ނިންމާލައިފިއެވެ.
އޭދަފުށީ ބަނދަރު ތަރައްގީކުރުމުގެ މަސައްކަތުގެ ދަށުން މިހާރު ކުރިއަށް ދަނީ ބަނދަރު ފާރު އެޅުމަށް ބޭނުންވާ ކޮންކްރީޓް ބްލޮކް ހަރުކުރުމުގެ މަސައްކަތްކަމަށް އެމްޓީސީސީން ބުނެއެވެ.
އޭދަފުށީގައި ބަނދަރު ތަރައްގީކުރުމުގެ މަޝްރޫްއެއް ކުރިއަށްގެންދަނީ މީގެ 30 އަހަރު ކުރިން އޭދަފުށީ ރައްޔިތުން ތަރައްގީކުރި ބަނދަރު ފުރި، ބަނދަރު ބޭނުން ކުރުމުގައި އެކިކަހަލަ ގޮންޖެހުންތަކާ ކުރިމަތިވަމުންދާތީއެވެ.
ބ. އަތޮޅުގެ ވެރިރަށް ކަމަށްވާ އޭދަފުށީގައި އޮންނަ ބަނދަރަކީ ވިޔަފާރީގެ ބަނދަރެކެވެ. އެ އަތޮޅުގެ އެހެން ރަށްރަށުން އެތައް އުޅަނދެއް ވަދެ ނުކުމެ ހަދާ ބަނދަރެކެވެ. ވިޔަފާރި މުދާ އަރުވާ ބޭލުމަށް ވަކި ސަރަހައްދެއް ކަނޑައެޅިފައި ނެތީވެސް ބަނދަރުގެ ޖާގަނެތުމުންނެވެ.
ނަމަވެސް މިހާރު ކުރިއަށްދާ ބަނދަރުގެ މަޝްރޫއު ނިމުމުން ރަށު ރައްޔިތުންނަށްށާއި، ބ. އަތޮޅުގެ ރައްޔިތުންނަށްވެސް ވަރަށް ބޮޑު ލުއިފަސޭހައެއްވާނެއެވެ.
އެ ރަށުގެ ރަށުގެ ހުޅަނގުފަރާތުގައި ތަރައްގީކުރާ މިބަނދަރުގެ މަސައްކަތުގެ ދަށުން، 303 މީޓަރުގެ އެއްގަމު ތޮށިލުމާ 371 މީޓަރުގެ ބޮޑުހިލަ ރިވެޓްމެންޓާއި 18 މީޓަރުގެ ކޮންކްރީޓް ބުރިޖާއި، 119 މީޓަރުގެ ބޮޑު ހިލަ ބޭރުތޮއްޓާއި، 63 މީޓަރުގެ ނެރުފައިކަށި، 5490 އަކަ މީޓަރުގެ ސަރަހައްދެއް ހިއްކުމާއި، ވާޓަރުގައި ރޭމްޕެއް ހިމެނުމާއި، ވާޓަރާއި އިންވެގެން ޕޭވްމެންޓަކާއި ބަނދަރު ބައްތި އަދި ނެރު ބައްތި ގާއިމް ކުރުން ހިމެނެއެވެ.
ބ. އޭދަފުށީ ބަނދަރު މަޝްރޫއަކީ ގާތްގަނޑަކަށް 64.67 މިލިއަން ރުފިޔާގެ މަޝްރޫއެކެވެ.