އައްޑޫ ސިޓީ ހިތަދޫން 19 ބިން ކުއްޔަށް ދޫކުރުމަށް އެ ސިޓީ ކައުންސިލުން ނިންމައިފިއެވެ.
އައްޑޫ ކައުންސިލުން ކުރި އިއުލާނެއްގައި ބުނީ މި ފުރުސަތު ހުޅުވާލައިފައި ވަނީ ރަޖިސްޓްރީ ކޮށްފައިވާ ފަރުދުންގެ ވިޔަފާރި، ކުންފުނި އަދި ޕާޓްނަރޝިޕްތަކަށް ކަމަށެވެ.
މި ބިންތަށް ދޫކުރަން ހަމަޖެހިފައި ވަނީ ވިޔަފާރީގެ މަސައްކަތްތަކުގެ އިތުރުން ގާ އެޅުމުގެ މަސައްކަތާއި ހެވީ/ލައިޓް އިންޑަސްޓްރިއަލް ބޭނުމަށެވެ.
އަދި ކުއްޔަށް ދޫކުރުމަށް ހަމަޖެހިފައިވަނީ 1،500 އަކަފޫޓުން ފެށިގެން 6،493 އަކަފޫޓުގެ ބިންތަކެއް ކަމަށް އެ ކައުންސިލުން ވަނީ ބުނެފައެވެ.
އެ ކައުންސިލުން ބުނިގޮތުގައި ބީލަމުގައި ބައިވެރިވުމަށް ޝައުގުވެރިވާ ފަރާތްތަކުން 300 ރުފިޔާގެ ނަން-ރިފަންޑަބަލް ރަޖިސްޓްރޭޝަން ފީއެއް ދައްކަންޖެހޭނެއެވެ. ބީލަމުގައި ރަޖިސްޓްރީ ވުމުގެ މުއްދަތު ހުޅުވާލާފައިވަނީ އިއްޔެ ފެށިގެން މި މަހުގެ 21 ވަނަ ދުވަހާއި ހަމައަށެވެ.
ރަޖިސްޓްރީ ވުމަށް ހުޅުވާލާފައިވަނީ ބަންދު ނޫން ކޮންމެ ދުވަހެއްގެ ހެނދުނު 8:00 އިން މެންދުރުފަހު 2:00 އަށް ހަމައަށެވެ. އަދި ބީލަމުގައި ބައިވެރިވުމަށް ރަޖިސްޓްރީ ކުރާ ފަރާތްތަކަށް ބިން ކުއްޔަށް ދޫކުރުމަށްޓަކައި ދެވޭ މައުލޫމާތު ކަރުދާސް އަދި ބީލަން ހުށަހަޅާ ފޯމް އެ އިދާރާއިން މެއިލް ކުރާނެ ކަމަށް ވެސް އައްޑޫ ކައުންސިލުން ވަނީ ބުނެފައެވެ.
އެ ކައުންސިލުން ބުނިގޮތުގައި ބީލަން ބަލައިގަތުމާއި ބީލަން ހުޅުވުން އޮންނާނީ އައްޑޫ ސިޓީ ކައުންސިލް އިދާރާގައި އަންނަ ސެޕްޓެމްބަރު މަހުގެ ހަތް ވަނަ ދުވަހުގެ ހެނދުނު 10:00 ގައެވެ.