ދިވެހިރާއްޖޭގައި ނަފްސާނީ ސިއްޙަތުގެ މައްސަލަތަކާ ކުރިމަތިލާ މީހުންނަށް އެހީތެރިކަން ފޯރުކޮށްދިނުމަށް ޤާއިމުކުރެވިފައިވާ ޤައުމީ ހެލްޕްލައިން 1677 ގެ ޚިދުމަތް މިއަހަރުގެ ފުރަތަމަ 6 މަސްދުވަހުގެ ތެރޭގައި 5820 މީހުން ބޭނުންކޮށްފައިވާކަން ސިއްޙީ ވުޒާރާއިން ހާމަކޮށްފިއެވެ.
2024 ވަނަ އަހަރުގެ ފެބުރުއަރީ 21 ގައި އިފްތިތާޙްކުރެވުނު މި ޚިދުމަތަކީ ނަފްސާނީ އުނދަގޫތަކާ ކުރިމަތިލާ ފަރާތްތަކަށް 24 ގަޑިއިރު ފުރަތަމަ އެހީތެރިކަން ލިބޭނެ ޚާއްޞަ ނަންބަރެކެވެ. އިފްތިތާޙްކުރި ފަހުން 2024 ވަނަ އަހަރު ނިމުނުއިރު މި ޚިދުމަތް 2576 މީހުން ހޯދާފައިވާއިރު، 2025 ވަނަ އަހަރުގެ ޖެނުއަރީން ޖުލައި 5 ގެ ނިޔަލަށް މި އަދަދު 5820 އަށް އިތުރުވެފައިވާކަން ފާހަގަކުރެވެއެވެ.
ހެލްޕްލައިނަށް ލިބޭ ކޯލްތަކުގެ ތެރޭގައި ނަފްސާނީ ސިއްޙަތުގެ ޚިދުމަތްތައް ލިބޭނެ ތަންތަނާ ބެހޭ މަޢުލޫމާތު ސާފުކުރުމާއި، ނަފްސާނީ އެހީތެރިކަން ހޯދުމާއި، އިމަރޖެންސީ ޙާލަތްތަކުގައި އެހީ ހޯދުމާއި، ފޮލޯއަޕް އަދި ރެފަރަލް ޚިދުމަތްތައް ހިމެނެއެވެ.
މި ޚިދުމަތުގެ ޒަރީޢާއިން ނަފްސާނީ ސިއްޙަތުގެ ފުރަތަމަ އެހީގެ އިތުރުން، މައްސަލަތައް ޙައްލުކުރުމަށް ލަފާދިނުމާއި، ބޭނުންވާ މަޢުލޫމާތު ފޯރުކޮށްދިނުމާއި، ކަމާގުޅޭ އެހެން ޚިދުމަތްތަކަށް ރިފަރކުރުމުގެ ޚިދުމަތްތައްވެސް ފޯރުކޮށްދެވެއެވެ.
ނަފްސާނީ ބަލިތަކާއި އުނދަގޫތައް ތަޙައްމަލުކުރަމުންދާ އެންމެހައި އުމުރުފުރާގެ ފަރާތްތަކަށް ދުވާލާއި ރޭގަނޑުގެ ކޮންމެ ވަގުތެއްގައިވެސް މި ޚިދުމަތް ލިބެން ހުންނާނެކަމަށް ސިއްޙީ ވުޒާރާއިން ޔަޤީންކަން ދީފައިވެއެވެ.