ދުވާފަރުގައި މިހާރު ކުރިއަށްދާ “ ދުވާފަރު ދަންޑަހެލު 2025″ ގައި މިއަދު މުބާރާތް ފެށުމުގެ ގޮތުން މިއަދު ހަވީރު ޑާރކްޕާރކް އަދި އިލެވެން އެޓޭކާރސް ކުޅުނު މެޗުގައި ވާދަވެރި ކުޅުމަކަށްފަހު 3-3 ގެ ނަތީޖާއަކުން ދެޓީމު އެއްވަރުވެއްޖެއެވެ.
މެޗުގެ ފުރަތަމަ ހާފުގައި މޮޅަށް ކުޅެ އިލެވެން އެޓޭކާރސް އިން މެޗު ޑޮމިނޭޓްކުރިއިރު، އެޓީމުގެ ފުރަތަމަ ގޯލް ކާމިޔާބުކުރީ މެޗުގެ 14 ވަނަ މިނެޓުގައި އެޓީމުގެ ޖާޒީ ނަންބަރު 5 މުހައްމަދު ސަފްރާޒް (ސައްޕެ)އެވެ. އެޓީމުގެ ދެވަނަ ގޯލް ކާމިޔާބުކުރީ މެޗުގެ 17 ވަނަ މިނެޓުގައި އެޓީމުގެ ޖާޒީ ނަންބަރު 12 މުހައްމަދު ފާސިރު (ފާއްޓެ)އެވެ.
ފުރަތަމަ ހާފުގައި ޑާރކްޕާރކްގެ ހަމަ އެކަނި ގޯލް ކާމިޔާބުކުރީ މެޗުގެ 24 ވަނަ މިނެޓުގައި އެޓީމުގެ ޖާޒީ ނަންބަރު 30 މުހައްމަދު ޖުމާން (ސްޓާލިން)އެވެ. މިނަތީޖާއާއި އެކު މެޗުގެ ފުރަތަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއިން އިލެވެން އެޓޭކާރސް ކުރީގައި އޮވެގެންނެވެ.
މެޗުގެ ދެވަނަ ހާފުގައި ކުޅުން ފަށައިގެން ޑާރކްޕާރކް ހަމަޔަކަށް ނޭޅިއުޅެނިކޮށް އިލެވެން އެޓޭކާރސް ވަނީ އަނެއްކާވެސް ގޯލެއް ކާމިޔާބުކޮށް އެޓީމުގެ ލީޑު ފުޅާކޮށްފައެވެ. މި ގޯލް އެޓީމަށް ކާމިޔާބުކޮށް ދިނީ މެޗުގެ 53 ވަނަ މިނެޓުގައި އެޓީމުގެ ކެޕްޓަން ހަސަން އަޒޫމް(ޒޫމް)އެވެ.
މި ގޯލަށް ފަހު ޑާރކްޕާރކުން ވަނީ އެޓީމުގެ ކުޅުން ރަގަޅުކުރުމުގެ ގޮތުން އެޓީމުގެ ތަޖުރިބާކާރު ފޯވަޑް އިސްމާއީލް އީސާ (މެސީ) ކުޅުމުގެ ތެރެއަށްނެރި އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން، އެޓީމުގެ ދެވަނަ ގޯލު މެޗުގެ 61 ވަނަ މިނެޓުގައި ކާމިޔާބުކޮށް ދިނީ އެޓީމުގެ ޖާޒީ ނަންބަރު 7 އިބްރާހިމް މަހުދީ ހުސެއިން (އިއްބެ)އެވެ. އަދި މެޗުގައި އެޓީމުން އެއްވަރުކުރި ގޯލް ކާމިޔާބުކޮށް ދިނީ މެޗުގެ 65 ވަނަ މިނެޓުގައި ޑާރކްޕާރކްގެ ޖާޒީ ނަންބަރު 30 މުހައްމަދު ޖުމާން (ސްޓާލިން)އެވެ. މިލަނޑާއެކު މެޗުގެ ކުޅުން ނިމިގެންދިޔައީ 3-3 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.
މި މެޗުގެ މޮޅު ކުޅުންތެރިއަކަށް ހޮވިފައިވަނީ ޑާރކްޕާރކަށް ދެގޯލު ކާމިޔާބުކޮށްދިން އެޓީމުގެ ޖާޒީ ނަންބަރު 7 މުހައްމަދު ޖުމާންއެވެ.
މާދަމާވެސް މިމުބާރާތުގެ މެޗެއް އޮންނާނެއެވެ. މިގޮތުން މާދަމާގެ މެޗުގައި ވާދަކުރާނީ ސިލްވަރ ޔުނައިޑެޓް އަދި ވޯރިއާރސްއެވެ. 3 ޖުލައިން 11 ޖުލައިގެ2025 ގެ ނިޔަލަށް ކުރިއަށް ގެންދާ މިމުބާރާތުގައި މިއަހަރު ޖުމްލަ ހަތަރު ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަތަރު ޓީމު ކޮންމެ ޓީމެއް ކޮންމެ ޓީމަކާއި އެއްމެޗު ކުޅޭގޮތަށެވެ. އަދި އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގު ފައިނަލުން ފުރުސަތު ލިބިގެންދާގޮތަށެވެ.