ރ. ދުވާފަރުގައި ފެށުމަށް ހަމަޖެހިފައިވާ ދަނޑަހެލު ކަޕް 2025 ގައި އެންމެ ފަހުގެ ޗެމްޕިއަން ޑާރކްޕާކް މިއަހަރުގެ މުބާރާތަށް ނިކުންނަނީ ވަރުގަދަ ސްކޮޑަކާއި އެކުއެވެ.
އެޓީމުގެ ފޭސްބުކް ޕޭޖުގައި އިއުލާންކޮށްފައިވާ ގޮތުން މިއަހަރު އެޓީމަށް ފުރަތަމަ ޑިވިޝަންގައި ކުޅޭ ރާއްޖޭގެ ނަންމަސްހޫރު ގިނަ ކުޅުންތެރިންތަކެއް ކުޅުމަށް ހަމަޖެހިފައިވެއެވެ.
އެގޮތުން، ދުވާފަރު ލެޖެންޑް އަދި ކުރީގެ ގައުމީ ޓީމްގެ ކުޅުންތެރިޔާ އިސްމާއިލް އީސަ (މެސީ) ވެސް ކުޅޭނީ ޑާރކް ޕާކް އަށް ކަމަށް އެޓީމުން ވަނީ އިއުލާންކޮށްފިއެވެ. މެސީގެ އިތުރުން ފުރަތަމަ ޑިވިސަންގެ އިތުރު ތިންކުޅުންތެރިން އެޓީމަށް ކުޅުމަށް ހަމަޖެހިފައިވާ ކަމަށް އެޓީމުން ވަނީ އިއުލާންކޮށްފައެވެ. އެއީ މިދިޔަ އަހަރުވެސް އެޓީމަށް ތަށިކާމިޔާބުކޮށްދިނުމުގައި މުހިއްމު ރޯލެއް އަދާކުރި އަބްދުﷲ ޖުނައިދު (ޖޭންނެ) އާއި އަހުނާފް ރަސީދު (އަހުއްކޮ) އަދި މިއަހަރު އަލަށް އެޓީމަށް ކުޅޭ އިބްރާހިމް މަހުދީ ހުސެއިން (އިއްބެ)އެވެ. މިކުޅުންތެރިނާއި އެކު ޑާރކް ޕާކް ވެގެން ދާނީ މިފަހަރު ވެސް މުބާރާތުގެ ފެވިރިޓުންގެ ގޮތުގައެވެ.
މުބާރާތް ފުރަތަމަ މެޗުގައި ޑާރކް ޕާކް ނިކުންނާނީ ނިމިދިޔަ އަހަރު މުބާރާތުގެ ފައިނަލްގައި އެޓީމާއި ދެކޮޅަށް ވާދަކުރި ރަނަރަޕް އިލެވެން އެޓޭކާސް ދެކޮޅަށެވެ. ފޯރިގަދަ މި މެޗާއި އެކު މުބާރާތް ފަށާނީ 4 ޖުލައި 2025 ވާ ހުކުރު ދުވަހުއެވެ.
ދަނޑަހެލު ކަޕްގައި މިއަހަރު ޖުމްލަ 4 ޓީމަކުން ބައިވެރިވެއެވެ. މިއަހަރު މުބާރާތުގައި ވާދަކުރަނީ ޑާރކް ޕާކް އިތުރުން އިލެވެން އެޓޭކާސް، ސިލްވަރ ޔުނައިޓެޑް އަދި ވޯރިއާސް އެވެ. މި މުބާރާތަކީ ދުވާފަރު ޒުވާނުންގެ މެދުގައި ކުޅިވަރުގެ ރޫހް އާލާކޮށް އެކުވެރި މުޖުތަމައުގައި ދުވާފަރުގެ ފުޓްބޯޅަ ކުރިއެރުވުމަށް ދުވާފަރު ކައުންސިލުން ކޮންމެ އަހަރަކުވެސް އިންތިޒާމުކުރާ މުބާރާތެކެވެ.