މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގެ ޕަބްލިކް ފައިނޭންސް އިންސްޓިޓިއުޓް (ޕީ.އެފް.އައި) އާއި އަރިއަތޮޅު އުތުރުބުރީ އަތޮޅު ކައުންސިލްގެ އިދާރާއާ ގުޅިގެން، ދައުލަތުގެ މާލިއްޔަތުގެ ގަވާއިދަށް އަހުލުވެރިކުރުމުގެ ޕުރޮގުރާމެއް ކުރިއަށްގެންގޮސްފިއެވެ.
ނިމިގެންދިޔަ މޭ މަހުގެ 29 އިން 31 އަށް އއ. ރަސްދޫގައި ބޭއްވި މި ޕުރޮގުރާމުގައި އެ ސަރަހައްދުގެ 08 ރަށަކުން ޖުމުލަ 63 ފަރާތަކުން ވަނީ ބައިވެރިވެފައެވެ.
މިއީ ދައުލަތުގެ މުވައްޒަފުން ދައުލަތުގެ މާލިއްޔަތުގެ ގަވާއިދަށް އަހުލުވެރިކުރުމުގެ ގޮތުން، މާލިއްޔަތުގެ ގަވާއިދުގައި ބަޔާންކޮށްފައިވާ މުހިންމު ބައިތައް ހިމެނޭހެން ސިލްސިލާކޮށް ޕީ.އެފް.އައި އިން ކުރިއަށްގެންދާ ތަމްރީނުތަކުގެ ތެރެއިން ކުރިއަށްގެންދެވުނު ޕުރޮގުރާމެކެވެ.
މި ޕުރޮގުރާމުގެ ބައިވެރިންނަށް ދައުލަތުގެ ފައިސާއާއި، ފައިސާ ހޯދުމާއި ބަލައިގަނެ ބެލެހެއްޓުމާއި، ދައުލަތުގެ މުދާ ސްޓޮކް އަދި ނީލަން ޕޯޓަލާ ގުޅޭ މަޢުލޫމާތު ދީފައިވެއެވެ.
މީގެ އިތުރުން، މުވައްޒަފުންގެ މާލީ ޒިންމާ އަދި މަސްއޫލިއްޔަތުތަކާއި، މުސާރައާއި އިނާޔަތްތަކާއި، ޓްރަސްޓްފަންޑާއި، ދައުލަތުގެ ފައިސާ ޚަރަދުކުރުމާއި ހިސާބު ބެލެހެއްޓުމުގެ އިތުރުން ދައުލަތުގެ ޕްރޮކިއުމަންޓް ނިޒާމާ ގުޅޭ ސެޝަންތައްވެސް ވަނީ ކުރިއަށްގެންގޮސްފައެވެ.
މި ޕުރޮގުރާމު އިންތިޒާމުކޮށް ހިންގުމުގައި އަރިއަތޮޅު އުތުރުބުރީ އަތޮޅު ކައުންސިލްގެ ފަރާތުން ލިބުނު އެއްބާރުލުން ފާހަގަކޮށް، އަތޮޅު ކައުންސިލަށް ވަނީ ހަނދާނީ ފިލައެއްވެސް އަރުވައިފައެވެ.