ރާއްޖޭގެ 18 ރަށެއްގައި އެނަޖީ މެނޭޖްމަންޓް ސިސްޓަމްސްއާއެކު 38 މެގަވޮޓް އަވާ ބެޓެރީ އެނަޖީ ސްޓޯރޭޖް ސިސްޓަމް ގާއިމު ކުރަން ޗައިނާގެ ކުންފުންޏަކާ ޙަވާލުކޮށްފިއެވެ.
މި މަޝްރޫޢު ޙަވާލުކޮށްފައިވަނީ ޗައިނާގެ ޝިޖިއާޒުއާންގް ކެލިން އިލެކްޓްރިކް ކޮމްޕެނީ ލިމިޓެޑްގެ ޖޮއިންޓް ވެންޗާ ގައުޑިއަން ނަންޖިން އޮޓޮމޭޝަން ކޯ، ލިމިޓެޑް އަދި ސިނޯ ސޯއާ ހައިބްރިޑް ބެއިޖިން ޓެކްނޮލޮޖީ ކޯ، ލިމިޓެޑާއެވެ.
މިމަސައްކަތުގެ އެއްބަސްވުމުގައި ފަތުރުވެރިކަމާއި ތިމާވެއްޓާއިބެހޭ ވުޒާރާއިން ސޮއި ކުރެއްވީ ވަޒީރު ތޯރިގް އިބްރާހީމެވެ. އަދި ކެލިން އިލެކްޓްރިކް ކޮމްޕެނީގެ ފަރާތުން ސޮއިކުރެއްވީ ޖެނެރަލް މެނޭޖަރު ވަންގް ޔޮންގެވެ.
މިއީ ހަކަތައާ ބެހޭ މިނިސްޓްރީން ކުރިއަށް ގެންދާ އެކްސަލަރޭޓިން ސަސްޓެއިނަބަލް ސިސްޓަމް ޑިވެލޮޕްމަންޓް ޔޫސިން ރިނިއުބަލް އެނަޖީ ޕްރޮޖެކްޓް (އެސްޕަޔާ) ގެ ދަށުން ކުރިއަށް ގެންދާ މަޝްރޫއެކެވެ. އެގޮތުން 18 ރަށެއްގައި މި ސިސްޓަމްތައް ގާއިމު ކުރުމަށް ހަމަޖެހިފައިވާ އިރު 500 ކިލޯވޮޓް އަވާ އިން ފެށިގެން 3،000 ކިލޯވޮޓް އަވާގެ ބެޓެރީ ސިސްޓަމްތައް ގާއިމު ކުރާނެ އެވެ.
ބެޓެރީ އެނަޖީ ސްޓޯރޭޖް ސިސްޓަމް ގާއިމުކުރާ ރަށްތައް:
1. ހދ. ހަނިމާދޫ: 2،000 ކިލޯވޮޓް އަވާ
2. ށ. މިލަންދޫ: 2،500 ކިލޯވޮޓް އަވާ
3. ނ. ހޮޅުދޫ: 1،500 ކިލޯވޮޓް އަވާ
4. ނ. މަނަދޫ: 3،000 ކިލޯވޮޓް އަވާ
5. ނ. ވެލިދޫ: 3،000 ކިލޯވޮޓް އަވާ
6. ރ. އަލިފުށި: 2.000 ކިލޯވޮޓް އަވާ
7. ރ. ހުޅުދުއްފާރު: 1،500 ކިލޯވޮޓް އަވާ
8. ބ. ދަރަވަންދޫ: 2.500 ކިލޯވޮޓް އަވާ
9. ބ. ތުޅާދޫ: 3،000 ކިލޯވޮޓް އަވާ
10. މ. މުލައް: 2،000 ކިލޯވޮޓް އަވާ
11. މ. މުލީ: 2،000 ކިލޯވޮޓް އަވާ
12. މ. ވޭވަށް: 500 ކިލޯވޮޓް އަވާ
13. މ. ރަތްމަންދޫ: 500 ކިލޯވޮޓް އަވާ
14. ތ. ގުރައިދޫ: 2،500 ކިލޯވޮޓް އަވާ
15. ތ. ތިމަރަފުށި: 3،000 ކިލޯވޮޓް އަވާ
16- ގއ. މާމެންދޫ: 1،000 ކިލޯވޮޓް އަވާ
17. ގދ. ފަރެސްމާތޮޑާ: 3،000 ކިލޯވޮޓް އަވާ
18. ގދ. ގައްދޫ: 2،500 ކިލޯވޮޓް އަވާ
މި މަޝްރޫޢުގެ މައިގަނޑު މަޤްޞަދަކީ އިއާދަކުރަނިވި ހަކަތައިން އުފައްދާ ކަރަންޓް ބޭނުންކުރާ މިންވަރު އިތުރު ކުރުމެވެ.
މިނިސްޓްރީން ބުނީ ކަނޑައެޅި ރަށްރަށުގައި 38 މެގަވޮޓް އަވާގެ ބެޓެރީ އެނަރޖީ ސްޓޯރޭޖް ސިސްޓަމް ބެހެއްޓުމުން މި ރަށްތަކުގައި އިތުރު ސޯލާ ޕީވީ ސިސްޓަމްތައް ގާއިމުކުރުމުން ގްރިޑް ސްޓެބިލައިޒް ކުރުމަށް މަގުފަހިކޮށް ދިނުމާއި އިތުރު ސޯލާ ޕީވީ ކެޕޭސިޓީ ވިއުގައަށް ގުޅުމަށް ފުރުޞަތު ފަހިވެގެން ދާނެ ކަމަށެވެ. އަދި ”މަގޭ ސޯލާ“ ޕްރޮގްރާމްގެ ދަށުންނާއި އަމިއްލަ ގޮތުން ގޭގޭގައާއި އިމާރާތްތަކުގެ ފުރާޅުގައި ސޯލާ ހަރުކުރުމަށް ވެސް މަގުފަހިވާނެ ކަމަށް ބުންޏެވެ.
މި 38 މެގަވޮޓް އަވާގެ ބެޓެރީ އެނާޖީ ސްޓޯރޭޖް ސިސްޓަމާ އެކު އަހަރަކު ގާތްގަނޑަކަށް 8.4 މިލިއަން ލީޓަރުގެ ޑީސަލް ސަލާމަތްކުރެވި، އަހަރަކު ގާތްގަނޑަކަށް 125 މިލިއަން ރުފިޔާގެ ތެލުގެ ޚަރަދު ސަލާމަތްކުރެވޭނެ އެވެ.