ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ. މުޙައްމަދު މުއިއްޒު އެދިލައްވައިގެން ބަރަކާތްތެރި ރަމަޟާން މަހުގެ ރޭތައް އިޙުޔާކުރުމަށް ޕީޕަލްސް ނޭޝަނަލް ކޮންގުރެސްއިން ސިލްސިލާ އިހުޔާ ފޯރަމްތަކުގެ ތެރެއިން ފުރަތަމަ ބައްދަލުވުން މި ރޭ ބާއްވަން ނިންމައިފިއެވެ
ދިވެހިރާއްޖޭގައި އެންމެ ގިނަ މެމްބަރުން އެކުލެވޭ ސިޔާސީ ޕާޓީން ބުނީ 1446 ވަނަ އަހަރުގެ ރަމަޟާން މަހުގެ ރޭތައް އިޙުޔާކުރުމަށް ޕީއެންސީން ކުރިއަށްގެންދާ ސިލްސިލާ ޕްރޮގުރާމުގެ ފުރަތަމަ ފޯރަމް ކުރިޔަށް ދާނީ މިރޭ 21:30 ގައި ކަމަށެވެ. އެ ފޯރަމުގައި ތަގުރީރުކުރެއްވުމަށް ހަމަޖެހިފައިވަނީ އިސްލާމީ ކަންތައްތަކާ ބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދެވެ.
މި ފޯރަމް ބޭއްވުމަށް ހަމަޖެހިފައިވަނީ ކޮންގްރެސް ހައުސް (ހ. ވެޔޮވިލާ / އާޓިފިޝަލް ބީޗް ކުރިމަތި) ގައެވެ. ޕީއެންސީން ވަނީ މިރޭގެ ފޯރަމްގައި ބައިވެރިވުމަށް ރާއްޖޭގެ ހުރިހާ ރައްޔިތުންނަށް ދައުވަތު ދީފައެވެ.
ޕީއެންސީން އިހްޔާ ފޯރަމް ކުރިއަށްގެންދާއިރު، އިސްލާމީ ކަންތައްތަކާއި ބެހޭ ވުޒާރާއިންވެސް ދަނީ އެހެން އަހަރުތަކެކޭވެސް އެއްގޮތަށް މިއަހަރުވެސް ސިލްސިލާކޮށް މާލޭގައި އަދި ފުރަތަމަ ފަހަރަށް އަތޮޅުތަކުގައިވެސް އިހްޔާ ފޯރަމްތައް ބާއްވަމުންނެވެ.