އިނގިރޭސި އެފްއޭކަޕްގެ ފަސްވަނަ ބުރުގައި ރޭ ރަށުން ބޭރުގައި 3-1 ގެ ނަތީޖާއަކުން ވުލްވްސް ބަލިކޮށް ލިވަޕޫލުން މުބާރާތުގެ ކުއާޓާ ފައިނަލުގެ ޖާގައެއް ކަށަވަރުކޮށްފިއެވެ.
މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ ލިވަޕޫލުން މެޗު ޑޮމިނޭޓްކުރިއިރު، މިހާފުގައި އެޓީމުން ވުލްވްސްގެ ގޯލަށް 11 ހަމަލާ ފޮނުވާލި ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.
މެޗުގެ ދެވަނަ ހާފުގައި ލިވަޕޫލުން އެޓީމުގެ އެޓޭކުތައް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ ތިން ލަނޑު ކާމިޔާބުކޮށްފައެވެ. އެގޮތުން އެޓީމުގެ ފުރަތަމަ ލަނޑު ދެވަނަ ހާފުގެ 51 ވަނަ މިނެޓުގައި ޑިފެންޑަރު އެންޑްރޫ ރޮބަޓްސަން ކާމިޔާބުކުރިއިރު، އޭގެ ދެމިނެޓް ފަހުން އެޓީމުގެ ލީޑު ފުޅާކޮށްދިނީ މުހައްމަދު ސަލާހްއެވެ.
މިމެޗުގައި ލިވަޕޫލުގެ ތިންވަނަ ލަނޑު ދެވަނަ ހާފުގެ މެޗުގެ 71 ވަނަ މިނެޓުގައި މިޑްފީލްޑަރު ކާޓިސް ޖޯންސް ކާމިޔާބުކުރިއިރު، މެޗުގެ އިތުރު ވަގުތުގެ ތެރޭގައި ވުލްވްސްއަށް ނަތީޖާގެ ފަރަގު ކުޑަކޮށްދިނީ ފޯވާޑް ހީ ޗަންގް ހުވާންގް އެވެ. އަދި މިލަނޑާއެކު މެޗުގެ ކުޅުނަ ނިމިގެންދިޔައީ 3-1 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ.