ދުބާއީ އެއާޕޯޓު އޮޕަރޭޝަންތައް ވަގުތީ ގޮތުން މެދުކަނޑާލައިފި އެވެ.
ދުބާއީ އެއާޕޯޓުގެ އޮޕަރޭޝަންތައ މެދުކަނޑާލާފައިމިވަނީ އެމެރިކާ އާއި އިޒްރޭލު ގުޅިގެން އީރާނަށް ހަމަލާދޭން ފެށި ހަމަލާތަކާއި ގުޅިގެން އިރާނުން މެދުއިރުމަތީގެ ގިނަ ގައުމުތަކަކަށް ހަމާލާދޭން ފެށުމާއި ގުޅިގެންނެވެ. އެގޮތުން އިރާނުން ވަނީ އެމެރިކާއާއި އިސްރާއީލަށް ވާގިވެރިވާ ހުރިހާ ބަޔަކަށް ހަމަލާދޭނެ ކަމުގެ އިންޒާރު ދީ މިހާރުވެސް ވަރުގަދަ ހަމަލާތަކެއް ގަލްފުގެ ގައުމުތަކަށް ރައްދުކުރަމުންނެވެ. އެގޮތުން އެންމެ ބޮޑެތި ހަމަލާތަކެއް އަމާޒުވި ދުބާއީ އެގައުމަކަށް ނިސްބަތްވާ ޔޫއޭއީއަށެވެ. އިރާނުން ވަނީ ޔޫއޭއީގެ ދުބާއީއާއި އަބޫ ދާބީއަށް ވަރުގަދަ ހަމަލާތަކެއް ދީފައި އެވެ.
މި ހަމަލާތަކާއި ގުޅިގެން ދުބާއީ އެއާޕޯޓު އޮތޯރިޓީއިން މިހާރު ވަނީ އެއާޕޯޓުގެ އޮޕަރޭޝަނެއް ވަގުތީގޮތުން މެދުކަނޑާލާފައިވާކަން ހާމަކޮށް އެއާލައިންތަކަށްވެސް އެކަން ރަސްމީކޮށް އަންގާފައި އެވެ.
އެއާޕޯޓުގެ އޮޕަރޭޝަންތައް މެދުކަނޑާލި އިރު މެދުއިރުމަތީގެ އެންމެ ބޮޑު ދެ އެއާލައިން ކަމަށްވާ ގަތަރު އެއާވޭސްއާއި އެމިރޭޓްސްއިން ވެސް ވަނީ ދަތުރުތައް ވަގުތީގޮތުން މެދުކަނޑާލައި ފްލައިޓުތައް ކެންސަލް ކޮށްފައެވެ. ޔޫއޭއީއަކީ އޭޝިއާއާއި ޔޫރަޕު ގުޅުވާލަދޭ މައި ހަބެވެ. އެގޮތުން އަބޫދާބީ އާއި ދުބާއީ ފަދަ މަންޒިލްތަކަކީ ދުނިޔޭގެ ވައިގެ ދަތުރުފަތުރުތަކުގެ މައި ޓްރާންސިޓް ހަބްތަކަށްވާއިރު އެއާޕޯޓުތައް ބަންދުކުރުމާއިއެކު ވައިގެ ދަތުުރުފަތުރަށް ބޮޑު ބުރޫއެއް އަރާނެ އެވެ.
އެމެރިކާ އާއި އިޒްރޭލު ގުޅިގެން އީރާނަށް ހަމަލާދޭން ފެށީ މިއަދު ހެނދުނު އެވެ. އެމެރިކާ އިސްވެ އޮވެ ފެށި މި ހަމަލާތަކަށް އިރާނުން ތިބީ ވަރަށް ފުރިހަމައަށް ތައްޔާރުވެގެންނެވެ. އެގޮތުން ހަމަލާތައް ދިންތާ ކުޑައިރުކޮޅެއްގެ ތެރޭގައި އިރާނުން ވަނީ އިސްރާއީލަށާއި ސަރަހައްދުގައި ހުރި އެމެރިކާގެ ހުރިހާ އަސްކަރީ މަރުކަޒަކަށް އަމާޒުކޮށް ހަމަލާތައް ދޭން ފަށާފައިއެވެ.
މިގޮތުން ކުވެއިތު، ބަހްރައިން، ޔޫއޭއީ، ގަތަރު، ޖޯޑަން އަދި ސައުދީ އަށް ވެސް އިރާނުން ހަމަލާތައް ދިން އިރު މި ހަމަލާތައް އަމާޒުކުރީ އެގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށެވެ. މިގޮތުންވެސް ގަތަރުގައި ހުންނަ އަލް ހުދެއިދު ވައިގެ އަސްކަރީ މަރުކަޒަށް އިރާނުން ވަރަށް ވަރުގަދަ ހަމަލާއެއް ދީފައިވާއިރު ބަހްރައިންގެ މަނަމާއަށްވެސް ވަރުގަދަ ހަމަލާއެއް އިރާނުން ވަނީ ދީފައި އެވެ.
މި ހަމަލާތަކުގައި އިރާނުން ބޭނުންކުރަމުންދަނީ ބެލިސްޓިކް މިސައިލްތައް ކަމަށް ރިޕޯޓުތައް ބުނެއެވެ.
އެމެރިކާއިން އިސްރާއީލާއި ގުޅިގެން އިރާނަށް ހަމަލާތަކެއް ދީފައިމިވަނީ އިރާނުގެ ނިއުކްލިއާ ޕްރޮގްރާމާއި ގުޅިގެން އެކަމުގެ ނުރައްކާ އެމެރިކާއާއި އިސްރާއީލަށް އޮތް ކަމަށް ބުނެފައިވާ ދަނޑިވަޅެއްގައި އެވެ. ނަމަވެސް އިރާނުން ވަނީ ނިއުކްލިއާ ޕްރޮގްރާމާއި ގުޅިގެން އެމެރިކާއިއެކު މަޝްވަރާގެ މޭޒަށް އައިސްފައި އެވެ. އަދި އެކަމުގެ މަޝްވަރާތައް ލަހުން ކުރިޔަށް ދިޔަނަމަވެސް ދެފަރާތުންވެސް އެއްބަސްވާ ހިސާބަކަށް މަޝްވަރާތައް ކުރިޔަށް ގޮސްފައިވުމުން މަޝްވަރާގެ އިތުރު ބުރުތަކަކަށް އިރާނުންވެސް ވަނީ އެއްބަސްވެފައި އެވެ. އަދި އެމަޝްވަރާތައް އަންނަ ހަފްތާގައި ފެށުމަށްވެސް އޮތީ ތައްޔާރުވެފައި އެވެ.
ނަމަވެސް މިއަދު ހެނދުނު ކުއްލި ގޮތަކަށް އިރާނަށް ދިން ހަމަލާތަކާއި ގުޅިގެން މި މަޝްވަރާތައް އެކުއެކީ ހުއްޓުމަކަށް އަންނާނެ ކަމަށް މަޝްރަހު ދިރާސާާ ކުރާ ފަރާތްތަކުން އަންނަނީ ބުނަމުންނެވެ. އަދި މިއީ މެދުއިރުމަތީގައި ފެށޭ ދިގު ހަނގުރާމައެއްގެ ގޮތުގައިވެސް ގިނަ ބަޔަކު އަންނަނީ ބުނަމުންނެވެ.