ޑިމޮކްރަސީގެ ހަމަތަކަށް ބަލާއިރުވެސް ރައްޔިތުންނަށް އެންމެ ފައިދާވާނީ ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއް ތާރީޚެއްގައި ބޭއްވުންކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ސަރުކާރު ހިންގާ ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އިން ރޭ ބޭއްވި ”ދިވެހީންގެރާއްޖެ ތަރާވީސް“ ހަރަކާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ދެ އިންތިޚާބު އެއް ދުވަހެއްގައި ބޭއްވުމަށް ހުށައެޅުމުގެ އެންމެ ބޮޑު ބޭނުމަކީ ރައްޔިތުން ތަމްސީލްކުރަން ހޮވާ މަޖިލިސް މެންބަރުން ހޮވުމަށް ވީހާވެސް ގިނަ ރައްޔިތުން ނިކުތުންކަމަށެވެ. ބައެއް ތަފާސްހިސާބުތައް ޙިއްސާކުރައްވާ ރައީސް ވިދާޅުވީ، ރާއްޖޭގެ މަލްޓި ޕާޓީ ޑިމޮކްރަސީގެ ޙަޔާތުގައި މި ވޭތުވެދިޔަ 4 އިންތިޚާބުގައިވެސް، އެންމެ ގިނަ ރައްޔިތުން ވޯޓު ލާން ނިކުމެފައިވަނީ ރިޔާސީ އިންތިޚާބުގައި ކަމަށެވެ.
އެގޮތުން ރިޔާސީ އިންތިޚާބުގައި ވޯޓު ލާން ނިކުންނަ މީހުންގެ ނިސްބަތް އެވަރެޖްކޮށް 86 އިންސައްތައިން މަތީގައި ހުރިއިރު، މަޖިލިސް އިންތިޚާބުގައި އެ އަދަދު ހުރީ 76 އިންސައްތައިގައެވެ.
”މީގެން ލިބޭ ފައިދާއަކީ ރައްޔިތުންގެ ބައިވެރިވުން އިތުރުވުން. މިހާތަނަށް އަދަދުތަކަށް ބަލާއިރު، އެންމެ ގިނަ ރައްޔިތުން ވޯޓު ލާން ނިކުމެފަވަނީ ރިޔާސީ އިންތިޚާބުގައި. މަޖިލީހާއި ކައުންސިލް އިންތިޚާބަށްވުރެ އެތައް ގުނައެއް އިތުރު،“ ރައީސް ވިދާޅުވިއެވެ.
މީގެ އިތުރުން، ދެ އިންތިޚާބު އެއްކޮށް ބޭއްވުމުގެ އަނެއް ފައިދާއަކީ އައު ސަރުކާރުގެ މެނިފެސްޓޯއާ އެއްގޮތަށް ބަޖެޓު އެކުލަވާލުމުގެ ފުރުސަތު ލިބުންކަން ރައީސް ފާހަގަކުރެއްވިއެވެ. މިހާރު އޮންނަ ގޮތުން ސެޕްޓެމްބަރު ނިމުމުގެ ކުރިން ބަޖެޓު ހުށަހަޅަން ޖެހޭތީ، އައު ސަރުކާރުގެ ފުރަތަމަ އަހަރު މެނިފެސްޓޯއާ އެއްގޮތަށް މަސައްކަތް ބައްޓަންކުރުމުގެ ފުރުސަތު ކުޑަވާކަމަށް އެމަނިކުފާނު ވިދާޅުވިއެވެ.
ރައީސް އިތުރަށް ވިދާޅުވީ، ދެ އިންތިޚާބު އެއް ތާރީޚެއްގައި ބޭއްވުމަށް ރައްޔިތުން ނިންމައިފިނަމަ، ޑިސެމްބަރު 1 ގައި އިންތިޚާބުވާ އައު މަޖިލީހަށް ބަޖެޓު ފާސްކުރުމުގައި ބައިވެރިވެވޭ ގޮތަށް މާލިއްޔަތު ޤާނޫނަށް އިސްލާހު ގެންނަވާނެ ކަމަށެވެ. މީގެ ސަބަބުން ސަރުކާރުގެ ސިޔާސަތުތައް ތަންފީޒުކުރުމަށް މަގުފަހިވެ، ރައްޔިތުންނަށް އެންމެ ފައިދާހުރި ގޮތަށް ކަންކަން ކުރިއަށްދާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.