އެމެރިކާއިން އީރާނަށް ދޭން އުޅޭ ހަމަލާ ”ވަރަށް ބޮޑަށް ގާތްވެފައިވާ“ ކަމަށް އިޒްރޭލަކު އޮފިޝަލަކާ ހަވާލާދީ އިޒްރޭލުގެ ނޫހެއް ކަމަށްވާ ”ޔެދިއޮތް އަހްރޮނޮތް“ އިން އަންގާރަ ދުވަހު ބުނެފިއެވެ.
ފާއިތުވި ދުވަސްތަކުގައި އެމެރިކާގެ ރައީސް ޑޮނަލްޑް ޓްރަމްޕާ ވާހަކަދެއްކި މަސްދަރުތަކާ ހަވާލާދީ އެ ނޫހުން ރިޕޯޓްކޮށްފައިވާ ގޮތުގައި، އީރާނާ ދެކޮޅަށް އަސްކަރީ ހަމަލާއެއް ދިނުމުގެ އަމުރު ނެރުމަށް ރައީސް ޓްރަމްޕް ހުރީ ކެތްމަދުވެފައެވެ.
މިކަމާ ގުޅޭގޮތުން އިޒްރޭލުގެ ”ޗެނަލް 12“ އަށް މަސްދަރުތަކުން މައުލޫމާތު ދީފައިވާ ގޮތުގައި، އިތުރު ފްރަންޓްތަކެއް ނުވަތަ ހަނގުރާމައިގެ އާ ދޮރުތަކެއް ހުޅުވިގެންދާނެ ފަދަ ހާލަތަކަށް ތައްޔާރުވުމުގެ މަސައްކަތް ތެލް އަވީވުން މިހާރު ވަނީ ކޮށް ނިންމާފައެވެ. މީގެ ކުރިން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނީ ތެލް އަވީވުން މިހާރު ހޭދަކުރަމުންދަނީ ވަރަށް ހައްސާސް ދުވަސްތަކެއް ކަމަށާއި، ކުރިމަތިވެދާނެ ކޮންމެ ފަދަ ހާލަތަކަށްވެސް އޭނާގެ ސަރުކާރު އޮތީ ތައްޔާރަށް ކަމަށެވެ.
ރައީސް ޓްރަމްޕްގެ ”ޓްރޫތް ސޯޝަލް“ ޕްލެޓްފޯމުގައި ކުރެއްވި ޕޯސްޓެއްގައި ބުނީ އީރާނުގެ ނިއުކްލިއާ މަޝްރޫއާ ގުޅޭގޮތުން އެމެރިކާއާއެކު އެއްބަސްވުމަކަށް ނާދެވިއްޖެނަމަ، އެއީ އީރާނަށް ވަރަށް ހިތްދަތި ދުވަހަކަށް ވާނެ ކަމަށެވެ. އީރާނާ ދެކޮޅަށް ފުޅާ ދާއިރާއެއްގައި އަސްކަރީ އޮޕަރޭޝަނެއް ހިންގުމުގެ ނުރައްކަލާ މެދު ޖޮއިންޓް ޗީފްސް އޮފް ސްޓާފްގެ ޗެއާމަން ޑެން ކޭން އިންޒާރު ދިން ކަމަށް ބުނާ ރިޕޯޓްތައް ރައީސް ޓްރަމްޕް ވަނީ ދޮގުކޮށްފައެވެ. އަދި ކުރިމަތިލުމެއް ހިނގައިފިނަމަ، ތެހެރާން ”ވަރަށް ފަސޭހައިން“ ބަލިކުރުމުގެ ގާބިލްކަން އެމެރިކާއަށް ލިބިގެންވާ ކަމަށް އޭނާ ފާހަގަކުރިއެވެ.
މި ދަނޑިވަޅުގައި، އެމެރިކާއާއި އީރާނާ ދެމެދު ބާއްވާ މަޝްވަރާތަކުގެ ތިންވަނަ ބުރު ބުރާސްފަތި ދުވަހު ޖެނީވާގައި ބޭއްވުމަށް ވަނީ ހަމަޖެހިފައެވެ. ދެ ގައުމުގެ ދެމެދުގައި މަސްރަހު ގޯސްވެފައިވާ މި ދަނޑިވަޅުގައި ބާއްވާ މި ބުރަކީ މިހާތަނަށް ބޭއްވޭ އެންމެ ހައްސާސް ބުރުގެ ގޮތުގައި ވަނީ ސިފަކޮށްފައެވެ.