ކުވޭތުން އެ ޤައުމުގެ ޤައުމީ ދުވަސް އަދި މިނިވަންކަމުގެ ދުވަސް ފާހަގަކުރާ މުނާސަބަތާއި ގުޅިގެން ކުވެއިތުގެ އަމީރު، އަލްއަމީރު ޝެއިޚް މިޝްޢަލް އަލް-އަޙްމަދު އަލް-ޖާބިރު އަލް-ޞަބާޙަށާއި، ބޮޑުވަޒީރު އަލްއަމީރު ޝެއިޚް އަޙްމަދު ޢަބްދުﷲ އަލް-އަޙްމަދު އަލް-ޞަބާޙަށާއަށް ރައީސުލްޖުމްހޫރިއްޔާ ތަހުނިޔާ ފޮނުއްވައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކްސްގައި މިއަދު ކުރެއްވި ޕޯސްޓެއްގައި ކުވޭތު ސަރުކާރަށާއި އަދި ރައްޔިތުންނަށްވެސް ތަހުނިޔާއާއި ހާއި ހެޔޮ އެދުންތައް ވަނީ ފޮނުއްވާފައެވެ.
އެމަނިކުފާނު ފާހަގަކުރެއްވިގޮތުގައި ދެޤައުމުގެ ގުޅުން ދެމިގެންވަނީ އިސްލާމީ އުސޫލުތަކަށް ތަބާވުމާއި އެކަކު އަނެކަކަށް އިޙްތިރާމްކުރުމާއި އިތުބާރު ދެމެހެއްޓުމަށް ވެފައިވާ އަޒުމުގެ މައްޗަށް ކަމަށްވަނީ ވިދާޅުވެފައެވެ. އަދި ދެޤައުމުގެ ގުޅުމަކީ ގިނަ ދުވަސްތަކެއް ވެފައިވާ ގުޅުމެއްކަމަށް ފާހަގަކުރަމުން ދިވެހިރާއްޖޭގެ ތަރައްޤީއަށް ކުވެއިތު ސަރުކާރުން ވެ ދެއްވާ އެހީތެރިކަމަށް ޝުކުރު އަދާ ކުރައްވާފައިވެއެވެ. އަދިކުރިޔަށް އޮތް ދުވަސްތަކުގައި މި ގުޅުން އިތުރަށް ފުޅާކޮށް އާ ހަރުފަތަކަށް ގެންދިއުމަށް އުންމީދުކުރާކަމަށްވެސް ވަނީ ވިދާޅުވެފައެވެ.
ކުވޭތުގެ ޤައުމީ ދުވަހަކީ ފެބްރުއަރީ މަހުގެ 25 ވަނަ ދުވަހެވެ. މި ދުވަހަކީ 1950 ވަނަ އަހަރު ޝެއިޚް އަބްދުﷲ އައް-ސާލިމް އައް-ސަބާޙް ވެރިކަމާއި ޙަވާލުވެވެޑައިގަތުން ފާހަގަކުރާ ދުވަހެވެ. އެމަނިކުފާނަކީ 1961 ގައި ކުވޭތަށް އިނގިރޭސީންގެ ވެރިކަމުގެ ދަށުން މިނިވަންވުމުގައި މުހިންމު ދައުރެއް އަދާކުރެއްވި ބޭފުޅެކެވެ.
އެޤައުމުގެ މިނިވަންކަމުގެ ދުވަހަކީ ފެބްރުއަރީ މަހުގެ 26 ވަނަ ދުވަހެވެ. އެއީ 1991 ގައި ގަލްފް ހަނގުރާމައިގެ ތެރޭގައި އެމެރިކާ އިސްވެ އެކުލަވާލި ބައިނަލްއަޤްވާމީ އިއްތިހާދެއްގެ އެހީގައި ކުވެއިތް އިރާޤުގެ އޮކިއުޕޭޝަނުން މިނިވަންވި ދުވަހުގެ ގޮތުގައި ފާހަގަކުރާ ދުވަހެކެވެ.
މި ދުވަސްތައް ފާހަގަކުރުމަށް އެޤައުމުގެ ހަވާއެރުވުމާއި، ޕެރޭޑްތަކާއި އަދި އެކި ބާވަތުގެ ޘަޤާފީ ހަރަކާތްތަށް ކުރިޔަށް ގެންދާނެއެވެ.