ބަރަކާތްތެރި ރަމަޟާން މަހު އަލްއަޤްޞާ މިސްކިތަށް ފަލަސްތީނު މީހުން ވަނުން އިޒްރޭލުން މަނާކޮށްފިއެވެ.
މީޑިއާތަކުން ރިޕޯޓު ކުރާ ގޮތުގައި މި ދިޔަ ހުކުރު ދުވަހު އަލްއަޤްސާ މިސްކިތަށް ވަނުމުގެ ހުއްދަ އިޒްރޭލުން ދީފައި ވަނީ އެންމެ 10,000 މީހުންނަށެވެ. އެ ހުރިހާ އެންމެންނަށް މިސްކިތަށް ވަދެވިފައިވަނީ އިޒްރޭލުގެ ޗެކްޕޮއިންޓުތަކުން ރަނގަޅަށް ބަލާ ފާސްކުރުމަށްފަހު އައިޑީ ހެދުމުންނެވެ.
ހުކުރު ދުވަހު އަލްއަޤްސާ މިސްކިތަށް ވަންނަން އެއް ވެސް ޒުވާނަކަށް ހުއްދަ ލިބިފައެއް ނުވެއެވެ. މިސްކިތަށް ވަނުމަށް އިޒްރޭލުން ހަމައެކަނި ހުއްދަ ދެނީ 12 އަހަރުން ދަށުގެ ކުޑަކުދިންނަށާއި 50 އަހަރުން މަތީގެ އަންހެނުންނަށާއި 55 އަހަރުން މަތީ ފިރިހެނުންނަށެވެ.
ފަލަސްތީނުގެ ވެސްޓްބޭންކުގައި 3.3 މިލިއަން މީހުން އުޅޭއިރު އެންމެ 10,000 މީހުންނަށް އަލްއަޤްސާ މިސްކިތުގައި ނަމާދުކުރުމުގެ ހުއްދަ ދިނުމަކީ ރަމަޟާން މަހު މުސްލިމުންނާ ދެކޮޅަށް އަޅިގެންދާ އަނިޔާވެރި ފިޔަވަޅެއް ކަމަށް އެތައް ބަޔަކު އަންނަނީ ފާހަގަކުރަމުންނެވެ.
ފާއިތުވެދިޔަ އަހަރުތަކުގައި މަދުވެގެން 250,000 އެއްހާ މީހުން އަލްއަޤްސާ މިސްކިތުގައި ކޮންމެ ދުވަހަކު އަޅުކަން އަދާކުރަމުން ދެއެވެ.