އައްޑޫ ސިޓީ އިކުއެޓޯރިއަލް ހޮސްޕިޓަލުގެ ކެތު ލެބުން މިހާތަނަށް 16 މީހުންނަށް ފަރުވާދީފައިވާ ކަމަށް އެ ހޮސްޕިޓަލުން ބުނެފިއެވެ.
އައްޑޫ އިކުއެޓޯރިއަލް ހޮސްޕިޓަލާއި އައިޖީއެމްއެޗް ގުޅިގެން، އައްޑޫ ސިޓީގައި ހިތުގެ ބަލިތަކަށް ދެވޭ ފަރުވާގެ ފެންވަރު މަތިކުރުމުގެ ގޮތުން އިންޓަވެންޝަނަލް ކާޑިއޮލޮޖީ ނުވަތަ ކެތު ލެބުގެ ޚިދުމަތް ރަސްމީކޮށް ފަށާފައިވަނީ މިއަހަރުގެ ޖެނުއަރީ މަހުގެ 28 ވަނަ ދުވަހުއެވެ.
ކެތު ލެބަކީ ހިތާއި ލޭހޮޅިތަކުގެ ދިރާސާތައް ކުރުމަށާއި، ބަލިތައް ދެނެގަނެ ފަރުވާ ދިނުމަށް ޚާއްޞަ ކުރެވިފައިވާ ޒަމާނީ ވަސީލަތްތައް ހިމެނޭ ތަނެކެވެ.
މި ލެބުގައި ކެތީޓަރެއް ބޭނުންކޮށްގެން ލޭހޮޅިތަކުގެ ތެރެއަށް ޚާއްޞަ ކުލައެއް (ޑައި) ފޮނުވައި، އެކްސް-ރޭގެ އެހީގައި ލޭހޮޅިތަކުގެ ހާލަތު ވަޒަންކުރެއެވެ. އަދި ލޭހޮޅިއެއް ބެދިފައިވާނަމަ، ސްޓެންޓް ލެއްވުން ފަދަ ފަރުވާތައް މިތަނުގައި ކުރިއަށް ގެންދެއެވެ.
މި ޚިދުމަތް ފެށިފަހުން މިހާތަނަށް ޖުމްލަ 16 ބަލިމީހަކަށް ކެތު ލެބުން ފަރުވާ ދީފައިވާކަމަށް ހޮސްޕިޓަލުން މަޢުލޫމާތު ދެއެވެ.
މީގެ ތެރޭގައި ހިމެނެނީ ކޮރޮނަރީ އެންޖިއޯގްރަފީ (ސީއޭޖީ) ހެދި 9 މީހަކާއި، ސީއޭޖީގެ އިތުރުން އެންޖިއޯޕްލާސްޓީ ހެދި 7 މީހެކެވެ.
އެންޖިއޯގްރަފީއަކީ ހިތުގެ ލޭހޮޅިތަކުގައި އެއްވެސް ބެދުމެއް ހުރިތޯ ބެލުމަށް ހަދާ ޓެސްޓެކެވެ.
މި ޓެސްޓުގައި އަތުގެ ކުޑަހުޅުން ނުވަތަ އުކުޅުވަޅުން ކެތީޓަރެއް މެދުވެރިކޮށް ޑައި ފޮނުވައި، އެކްސްރޭގެ އެހީގައި ލޭހޮޅިތަކުގެ ތަފްޞީލީ މަންޒަރުތައް ބަލައެވެ.
އެންޖިއޯޕްލާސްޓީއަކީ ބެދިފައިވާ ލޭހޮޅިތައް ހުޅުވައިދިނުމަށް ދެވޭ ފަރުވާއެކެވެ. މި އިޖުރާއަތުގެ ތެރެއިން ކުޑަ ބެލޫނެއް ބޭނުންކޮށްގެން ލޭހޮޅި ފުޅާކުރުމަށްފަހު، އެތަން ހުޅުވިފައި ބެހެއްޓުމަށްޓަކައި ސްޓެންޓް އެއް ލައްވައެވެ.
މީގެ ސަބަބުން ހިތަށް ލޭ ދައުރުވުން އިތުރަށް ފަސޭހަވެގެންދެއެވެ. މިއީ އެންޖިއޯގްރަފީއަށްފަހު، ބަލިމީހާގެ ހާލަތަށް ބަލައި ދެވޭ މުހިންމު ފަރުވާއެކެވެ.