މިހާރު ކުރިއަށްދާ ޕްރެޒިޑެންޓްސް ކަޕްގެ ފުޓްބޯޅަ މުބާރާތުގެ ގްރޫޕް 2 ގައި މިއަދު ހަވީރު ނިއުރޭޑިއަންޓް ސްޕޯޓްސް ކުލަބާއި ކުލަބް އީގަލްސް ވާދަކުރި މެޗު 2-1 ގެ ނަތީޖާއަކުން ކާމިޔާބުކޮށް ނިއު އިން މުބާރާތުގެ ސެމީފައިނަލްގެ ޖާގައެއް ކަށަވަރުކޮށްފިއެވެ.
މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު މިމެޗުގައި ފުރަތަމަ ލަނޑުޖަހައި ކުރިހޯދީ ނިއުރޭޑިއަންޑް އިންނެވެ. މިލަނޑު ފުރަތަމަ ހާފުގެ 12 ވަނަ މިނެޓުގައި ކާމިޔާބުކޮށްދިނީ ޑަ ސިލްވާ އެވެ.
މީގެ އިތުރުން ވެސް މިހާފުގައި ދެޓީމުން ލަނޑުޖަހާނެ ރަނގަޅު ގިނަ ފުރުސަތުތަކެއް ތަނަވަސްކޮށްފައިވާއިރު އީގަލްސް އިން މެޗުގެ ނަތީޖާ އެއްވަރުކުރީ ފުރަތަމަ ހާފުގެ އިތުރު ވަގުތުގެ ތެރޭގައެވެ. މިލަނޑު އެޓީމަށް ކާމިޔާބުކޮށްދިނީ އިސާމް ސަލީމް އެވެ.
މިއީ އެޓީމަށް ލިބުނު ކޯނަރެއްގައި އިބްރާހިމް މަހުދީ ގޯލް ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.
މެޗުގެ ދެވަނަ ހާފުގައި ނިއުރޭޑިއަންޓުން އެޓީމުގެ އެޓޭކުތައް އިތުރަށް ވަރުގަދަކުރިއިރު މެޗުގެ 56 ވަނަ މިނެޓުގައި ކެޕްޓަން އަލީ އަޝްފާގް ތަނަވަސްކޮށްދިން ފުރުސަތެއްގައި ޑަސިލްވާ ވަނީ އިތުރު ލަނޑެއް ކާމިޔާބުކޮށް އެޓީމަށް އަލުން ލީޑު ހޯދައިދީފައެވެ.
މީގެ އިތުރުން ވެސް މިހާފުގައި ނިއުގެ ލީޑު ފުޅާކުރުމަށް އެޓީމުގެ ކެޕްޓަން އަލީ އަޝްފާގްގެ އިތުރުން އަލީ ފާސިރު އަދި އަލް ހާޖީއަށް ވަނީ ވަރަށް ހުސް ފުރުސަތުތަކެއް ލިބި ބޭނުންނުކުރެވިފައެވެ. މިއާއެކު މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-1 ގެ ނަތީޖާއަކުން ނިއުރޭޑިއަންޓް ކުރީގައި އޮވެގެންނެވެ.
މިނަތީޖާއެކު ގުރޫޕް ސްޓޭޖުގައި ކުޅުނު ދެޗުން ނިއުއަށް ހަތަރު ޕޮއިންޓް ލިބިފައިވާއިރު، ގުރޫޕް ސްޓޭޖުގެ ފަހު މެޗުގައި އޮޑި ސްޕޯޓްސް ކުލަބު އަތުން މޮޅުވެ ސެމީފައިނަލުން ޖާގަ ހޯދުމުގެ ފުރުސަތު ކުލަބު އީގަލްސްއަށް އޮތްއިރު، އެމެޗު އެއްވަރުވެ ނުވަތަ އީގަލްސް ބަލިވެއްޖެނަމަ މިގުރޫޕުން ސެމީގެ ދެވަނަ ޖާގަ ލިބޭނީ އޮޑި ސްޕޯޓްސް ކުލަބަށެވެ.