ދ. މާއެނބޫދޫގެ ބިންހިއްކުމަށް ބޭނުންވާ އީއައިއޭގެ މަސައްކަތް ކުރިއަށް އޮތް ދެތިން ހަފްތާގެ ތެރޭގައި ނިންމާ ޢަމަލީ މަސައްކަތް ފެށޭނެކަށާއި އަދި އެރަށުގައި ފުޓުބޯޅަ ދަނޑަކާއި ވޮލީ ކޯޓެއް އަޅައިދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުހޫރިއްޔާ މިހެން ވިދާޅުވީ މިއަދު އެރަށުގެ ރައްޔިތުންނާއި ބައްދަލުކުރެއްވުމަށް ބޭއްވި ރަސްމިއްޔާތުގައެވެ. މިރަސްމިއްޔާތުގައި ވާހަކަފުޅު ދައްކަމުން ރައީސް ވިދާޅުވީ މާއެނބޫދޫއަށް އެމަނިކުފާނު ވަޑައިގަތީ އެރަށުގެ ތަރައްޤީއަށް ކުރުމަށް ރިޔާސީ އިންތިޚާބުގައި ވައުދުވެވަޑައިގެންނެވި މަޝްރޫޢުތަކުގެ ތެރެއިން ވަޢުދުވެފައިވާ ބިން ހިއްކުމުގެ މަސައްކަތް އަވަހަށް ފަށްޓަވާނެކަމުގެ ޔަޤީންކަން ދެއްވުންކަމަށެވެ.
އެމްޓީސީސީ އާއި ޙަވާލުކޮށްގެން ކުރިޔަށް ގެންދާ މިމަޝްރޫއުގައި 30 ހެކްޓަރުގެ ބިން ހިއްކާނެކަމަށް ރައީސް ވިދާޅުވިއެވެ. އަދި އީއައިއޭ ނިމުނުހާ އަވަހަށް އެމްޓީސީސީން މިމަސައްކަތްފަށައި ބާރުދުވެލީގައި ނިންނާމެކަމަށްވެސް އެމަނިކުފާނު ވިދާޅުވިއެވެ.
އަދި މީގެއިތުރުންވެސް ގިނަ މަޝްރޫޢުތަކެއް މާއެނބޫދޫގެ ތަރައްޤީއަށް އެބަހުރިކަން ރައީސް ފާހަގަކުރެއްވިއެވެ. އެގޮތުން އެރަށުގައި ހުއްޓިފައިވާ ފެނާ ނަރުދަމާގެ މަޝްރޫޢު ކުރިއަށްދާނެކަމުގެ ޔަޤީންކަން ރައީސް ދެއްވިއެވެ. އަދި މާއެނބޫދޫ ސްކޫލް މަޓިޕަރޕަސް ހޯލުގެ މަސައްކަތް މެއި މަހު ނިންމަވާނެކަން ވަނީ ފާހަގަކުރައްވާފައެވެ.
ރައީސްގެ ވާހަކަފުޅުގައި މާއެނބޫދުއަށް ބޭނުންވާ އެހެން ކަންކަންވެސް ކޮށްދެއްވާނެކަމަށް ވިދާޅުވިއެވެ. އޭގެރެތޭގައި ސިއްޙީ މަރުކަޒަށް ބޭނުންވާ ޖާގައާއި ވަސީލަތް އިތުރުކޮށް ފުރިހަމަކޮށްދިނުމާއި، ކުޅިވަރުގެ ވަސީލަތައް ޤާއިމްކުމުގެ ގޮތުން ފުބޯޅަ ދަނޑާއި ވޮލީ ކޯޓާއި އައުޓްޑޯ ޖިމާއި، ކުޑަކުދިންގެ ޕާކް ތަރައްޤީކުރުންވެސް ހިމެނޭކަމަށް ރައީސް ވިދާޅުވިއެވެ. އަދި މީގެ އިތުރުން ދ. އަތޮޅުގައި އާރުޓީއެލްގެ ޚިދުމަތް ފެށުމާއި، މާއެނބޫދޫގެ ކަރަންޓުގެ މައްސަލައަށްވެސް ޙައްލު ގެނެސްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވިއެވެ.