އިނގިރޭސިވިލާތުން އެމެރިކާއަށް ކަނޑައެޅި ސަފީރުގެ މަގާމަށް ޕީޓާ މެންޑެލްސަން އައްޔަންކުރުމާ ގުޅިގެން ފެންމަތިވި މައްސަލަތަކަކާ ހުރެ، ބޮޑުވަޒީރު ކިއަރު ސްޓާމާގެ ޗީފް އޮފް ސްޓާފް މޯގަން މެކްސްވީނީ މަގާމުން އިއްޔެ އިސްތިއުފާ ދީފިއެވެ.
މެކްސްވީނީ މި ނިންމުން ނިންމަވާފައިވަނީ، މަރުވެފައިވާ ޖިންސީ ކުށްވެރިޔާ ޖެފްރީ އެޕްސްޓީން އާއި މެންޑެލްސަންއާ ދެމެދު އޮތް ގުޅުމުގެ އާ ތަފުސީލުތަކެއް ހާމަވުމާ ގުޅިގެންނެވެ.
މެކްސްވީނީ އިއްޔެ ނެރުއްވި ބަޔާނެއްގައި ވިދާޅުވީ، ސަރުކާރުގެ މަގާމުން އިސްތިއުފާ ދެއްވަން ނިންމެވީ ފުންކޮށް ވިސްނެވުމަށް ފަހު ކަމަށެވެ. އަދި މެންޑެލްސަން އެ މަގާމަށް އައްޔަންކުރުމަކީ ނިންމި ނުބައި ނިންމުމެއް ކަމަށާއި، އޭނާގެ ސަބަބުން ލޭބާ ޕާޓީއަށާއި ގައުމަށް އަދި ސިޔާސީ ދާއިރާއަށް އޮތް އިތުބާރަށް ބޮޑެތި ގެއްލުންތަކެއް ލިބިފައިވާ ކަމަށް ވެސް އޭނާ ބުންޏެވެ.
މީގެ އިތުރުން، އެ މަގާމަށް މެންޑެލްސަން އައްޔަންކުރުމަށް ބޮޑުވަޒީރަށް ލަފާދެއްވީ އޭނާ ކަމަށްވާތީ، އެކަމުގެ ފުރިހަމަ ޒިންމާ އުފުއްލަވާ ކަމަށް ވެސް މެކްސްވީނީ ވަނީ ބުނެފައެވެ.
އެމެރިކާގެ ޖަސްޓިސް ޑިޕާޓްމަންޓުން އާންމުކުރި ލިޔެކިޔުންތަކަކުން، މެންޑެލްސަން އާއި އެޕްސްޓީންއާ ދެމެދު ކޮށްފައިވާ ބަދަހި މުއާމަލާތްތަކެއް ފެންމަތިވުމާ ގުޅިގެން، ލޭބާ ޕާޓީގެ މެންބަރުން ދިޔައީ މެކްސްވީނީ އިސްތިއުފާ ދެއްވުމަށް ބާރުއަޅަމުންނެވެ. އެ މެންބަރުން ތުހުމަތުކުރާ ގޮތުގައި، މެންޑެލްސަންގެ ފަސްފަހަތް ބަލަންޖެހޭ ވަރަށް ބަލާފައެއް ނުވެ އެވެ.
ބޮޑުވަޒީރު ސްޓާމާ ވިދާޅުވީ، އޮކްޓޯބަރު 2024 އިން ފެށިގެން ޗީފް އޮފް ސްޓާފްގެ މަގާމުގައި ހުންނެވި މެކްސްވީނީއާ އެކު މަސައްކަތް ކުރެއްވުމަކީ ލިބުނު ޝަރަފެއް ކަމަށެވެ.
މެންޑެލްސަން ސަފީރުކަމުގެ މަގާމުން ވަކިކޮށްފައިވަނީ މިދިޔަ ސެޕްޓެމްބަރު މަހު އެވެ. މިދިޔަ ހަފުތާގައި އޭނާ ވަނީ ލޭބާ ޕާޓީ އާއި ހައުސް އޮފް ލޯޑްސްއިން ވެސް ވަކިވެފަ އެވެ.
ސަރުކާރުގެ ސިއްރު މައުލޫމާތުތަކެއް އެޕްސްޓީންއަށް ހިއްސާކުރި ކަމަށް ކުރެވޭ ތުހުމަތުތަކާ ގުޅިގެން، މެންޑެލްސަންއަށް ދީފައިވާ 38,750 އާއި 55,000 ޕައުންޑާ ދެމެދުގެ އަދަދެއްގެ އިނާޔަތް މުރާޖައާކުރުމުގެ މަސައްކަތް އިނގިރޭސި ފޮރިން އޮފީހުން މިހާރު ދަނީ ކުރަމުންނެވެ.
މެކްސްވީނީގެ އިސްތިއުފާއާ ގުޅިގެން ބޮޑުވަޒީރު ސްޓާމާއަށް އޮތް ފިއްތުންތައް ވަނީ އިތުރުވެފަ އެވެ. ސަރުކާރުގެ އިސް ބޭފުޅުން އެ ނިންމުމަކީ ”ބޮޑު ގޯހެއް“ ކަމަށް އެއްބަސްވެވަޑައިގަންނަވާއިރު، ބޮޑުވަޒީރަށް އޮތް ތާއީދު ދަށަށް ދަމުންދާ މި ދަނޑިވަޅުގައި ޕާޓީން ބޮޑުވަޒީރާ އެކު ސާބިތުވެ ތިބުމަށް އެ ބޭފުޅުން ދަނީ ގޮވާލައްވަމުންނެވެ.