އިނގިރޭސި ޕްރިމިއާ ލީގުގައި ރޭ ލިވަޕޫލް 2-1 އިން ބަލިކޮށް މެންޗެސްޓާ ސިޓީން މުހިއްމު މޮޅެއް ހޯދައިފިއެވެ.
ލިވަޕޫލްގެ ދަނޑުގައި ކުޅުނު މި މެޗުގެ ފުރަތަމަ ހާފްގައި ގޯލެއް ފެނިގެން ގޮސްފައި ނުވާއިރު، މި ހާފުގައި ލިވަޕޫލަށް ލީޑު ނަގައިދޭން އެޓީމުގެ ފްރާންސް ފޯވާޑް ހޫގޯ އެކިޓީކޭ އަށް ހުސް ފުރުސަތެއް ލިބުނު ނަމަވެސް އޭނާ ބޮލުން ފޮނުވާލި ހަމަލާ ދިޔައީ ގޯލާ އަމާޒުނުވެ ބޭރަށެވެ.
މި މެޗުގައި ފެނިގެންދިޔަ ފުރަތަމަ ގޯލު މެޗުގެ 74 ވަނަ މިނެޓްގައި ލިބުނު ހިލޭޖެހުމަކުން ލިވަޕޫލަށް ކާމިޔާބުކޮށްދިނީ ޑޮމިނިކް ސޮބޮސްލާއި އެވެ. މެޗުގެ 84 ވަނަ މިނެޓްގައި ބަނާޑޯ ސިލްވާ ސިޓީއަށް ނަތީޖާ އެއްވަރުކޮށްދިން އިރު، މި މެޗުން ސިޓީ މޮޅުވީ އިތުރު ވަގުތުގެ ތެރޭގައި ލިބުނު ޕެނަލްޓީއަކުން އާލިން ހާލަންޑް ކާމިޔާބުކުރި ގޯލުންނެވެ. މި ޕެނަލްޓީ ސިޓީއަށް ލިބުނީ އެޓީމުގެ މެތުއެސް ނުނޭސް އަށް ލިވަޕޫލްގެ ކީޕަރު އެލިސަން ކުރި ފައުލަކާ ގުޅިގެންނެވެ.
މި މެޗުގެ ފަހު ވަގުތުކޮޅުތެރޭ ހާލަންޑަށް ކުރި ފައުލަކާ ގުޅިގެން ލިވަޕޫލްގެ ސޮބޮސްލާއި އަށް ދެއްކި ރަތްކާޑާއެކު އެޓީމުން މެޗު ނިންމާލީ 10 ކުޅުންތެރިންނާއެކުއެވެ.
މި މޮޅާއެކު 25 މެޗުން ލިބުނު 50 ޕޮއިންޓާ އެކު ސިޓީ އޮތީ ލީގުގެ ދެވަނައިގަ އެވެ. އެއްވަނައިގައި 25 މެޗުން 56 ޕޮއިންޓު ހޯދައިގެން އޮތީ އާސެނަލް އެވެ. ތިންވަނައިގައި 25 މެޗުން 47 ޕޮއިންޓާ އެކު އެސްޓަންވިލާ އޮތްއިރު، ހަތަރުވަނައިގައި އޮތް މެންޗެސްޓާ ޔުނައިޓެޑަށް 25 މެޗުން ލިބިފައިވަނީ 44 ޕޮއިންޓެވެ. އަދި ފަސްވަނައިގައި 25 މެޗުން 43 ޕޮއިންޓު ހޯދައިގެން ޗެލްސީ އޮތްއިރު، ހަވަނައިގައި 25 މެޗުން 39 ޕޮއިންޓާއެކު އޮތީ ލިވަޕޫލް އެވެ.
ލީގުގައި ސިޓީން ދެން ބައްދަލުކުރާނީ ފުލަމްއާއެވެ. ލިވަޕޫލް ނިކުންނާނީ ސަންޑަލޭންޑާއި ދެކޮޅަށެވެ.