މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީ (އެމްޓީސީސީ) ގެ ”ސާބަސް ޔަންމާ ޕްރޮމޯ 2026“ އިފްތިތާޙު ކޮށްފިއެވެ.
މި ޕްރޮމޯ ފެށީ މޯލްޑިވްސް މެރިން އެކްސްޕޯގެ ހަވާސާގައި އިއްޔެ ބޭއްވި ހާއްސަ ހަފުލާއެއްގައެވެ.
މި ޕްރޮމޯ ފައްޓަވައިދެއްވީ އެމްޓީސީސީގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ޖަމްޝީދެވެ. މި ހަފުލާގައި އެމްޓީސީސީގެ އިސްވެރިން ބައިވެރިވެވަޑައިގެންނެވިއެވެ. މި ޕްރޮމޯޝަން ކުރިއަށްދާނީ 15 ފެބްރުއަރީ އިން ފެށިގެން 31 މާރޗް 2026 ގެ ނިޔަލަށެވެ.
މި ޕްރޮމޯޝަންގެ މަގު ސަދަކީ ކަސްޓަމަރުންނަށް ޑިސްކައުންޓާއެކު އެމްޓީސީސީގެ ޔަންމާ ޔިންޖީނު ވިއްކުންކަމަށް އެފަރާތުން މައުލޫމާތުދެއެވެ. މި ޕްރޮމޯގެ ދަށުން ބައްލަވައިގަންނަވާ ކޮންމެ ޔަންމާ އިންޖީނަކަށް 8 ޕަސެންޓްގެ ޑިސްކައުންޓެއް ލިބިވަޑައިގަންނަވާނެކަމަށާއިއަދި މި ޕްރޮމޯގައި ބައިވެރިވެވަޑައިގަތުމަށް 10 ޕަސެންޓްގެ ބުކިންގ ފީ އެއް 31 މާރޗް ގައި ނުވަތަ އެ ދުވަހުގެ ކުރިން ދައްކަވާ އިންޖީނު އޯޑަރ ޔަޤީން ކުރައްވަން ޖެހިވަޑައިގަންނަވާނެކަމަށްވެސް އެކުންފުނިން މައުލޫމާތު ދެއެވެ.
އެމްޓީސީސީއަކީ ’މޯލްޑިވްސް މެރިން އެކްސްޕޯ 2026‘ ގެ ކޯ ސްޕޮންސަރެކެވެ. މި އެކްސްޕޯގައި އެމްޓީސީސީގެ ސްޓޯލުން އައު މެރިން އުފެއްދުންތަކާއި ޙިދުމަތްތައް ތަޢާރަފު ކުރާނެއެވެ. އަދި އެމްޓީސީސީގެ ވިޔަފާރީގެ ބައިވެރިން ކަމުގައިވާ ޔަންމާއާއި ކާސްޓްރޯލް ކުންފުނިތަކުގެ އިސް ވެރިންނާއެކު ޕެނަލް ޑިސްކަޝަންތަކުގައި ބައިވެރިވެ އަގުހުރި މަޢުލޫމާތުތަކެއް ޙިއްސާ ކުރާނެއެވެ. މީގެ އިތުރުން އެމްޓީސީސީ ކަށަވަރު ފޭސްބުކް ޕޭޖް މެދުވެރިކޮށް ލަކީ ޑްރޯއެއް ގައި ބައިވެރިވެވަޑައިގަތުމުގެ ފުރުސަތު 5 ފެބްރުއަރީ 2026 އިން ފެށިގެން ވަނީ ހުޅުވާލެވިފައެވެ. މި ލަކީ ޑްރޯ ކާމިޔާބު ކުރައްވާ ފަރާތުގެ ނަން 8 ފެބްރުއަރީ 2026 ގައި މޯލްޑިވްސް މެރިން އެކްސްޕޯ ގެ ހަވާސާގައި އިއުލާނު ކުރާނެއެވެ. އަދި އެފަރާތަކަށް 10,000 ރުފިޔާގެ ފައިސާގެ އިނާމެއް ލިބިވަޑައިގަންނަވާނެއެވެ.
އެމްޓީސީސީގެ އަމާޒަކީ އަބަދުވެސް ކަސްޓަމަރުންނަށް ލުއިފަސޭހަ ގޮތްތަކެއް ހޯދައިދިނުމެވެ. އެގޮތުން ކޮންމެ އަހަރަކުވެސް އެކިއެކި ޕްރޮޑަކްޓްތަކުން ކަސްޓަމަރުންނަށް އަމާޒުކޮށް ޕްރޮމޯޝަންތައް ބޭއްވުމާއި ރާއްޖޭގެ އެކި ކަންކޮޅުތަކުގައި ތިބި އެމްޓީސީސީގެ ކަސްޓަމަރުންނަށް މައުލޫމާތު ފޯރުކޮށްދިނުމުގެ އިތުރުން އިންޖީނުތައް ރަނގަޅަށް ބެލެހެއްޓުމާއި ޓެކްނިކަލް ކަންކަމަށް އަހުލުވެރި ކުރުމުގެ ހަރަކާތްތައް އެ ކުންފުނިން އަބަދުވެސް ރާވަ އި ހިންގަމުން ގެންދެއެވެ.