އިންޑިއާގެ ބޮޑުވަޒީރު ނަރެންދުރަ މޯދީ ދެ ދުވަހުގެ ރަސްމީ ދަތުރުފުޅެއްގައި އިއްޔެ މެލޭޝިޔާގެ ވެރިރަށް ކުއަލަލަމްޕޫރަށް ވަޑައިގެންފިއެވެ.
މި ދަތުރުފުޅުގައި ކުއަލަލަމްޕޫރުގެ އެއާޕޯޓުން ބޮޑުވަޒީރު މޯދީއަށް މަރުހަބާ ދެންނެވީ މެލޭޝިޔާގެ ބޮޑުވަޒީރު އަންވަރު އިބްރާހީމެވެ. މޯދީ އަށް މަރުހަބާ ދެންނެވުމުގެ ގޮތުން ހާއްސަ ހަރަކާތްތަކެއް އެއާޕޯޓުގައި ވަނީ ކުރިއަށް ގެންގޮސްފައެވެ.
މޯދީ އާއި އަންވަރާ ދެބޭފުޅުން ކާރުގައި އިންނެވި ފޮޓޯފުޅެއް މޯދީ ވަނީ ”އެކްސް“ ގައި ޕޯސްޓު ވެސް ކުރައްވައިފައެވެ. އެ ފޮޓޯއިން ފެންނަ ގޮތުގައި ދެ ބޭފުޅުން ވެސް ވަރަށް އެކުވެރި މާހައުލެއްގައި ”ހިނިތުންވުމާއެކު“ މަޝްވަރާ ކުރައްވަމުން ގެންދަވާ ތަން ފެނެއެވެ.
މި ދަތުރުފުޅާ ގުޅޭގޮތުން ބޮޑުވަޒީރު މޯދީ ”އެކްސް“ގައި ކުރެއްވި ޕޯސްޓެއްގައި ވިދާޅުވީ، ކުއަލަލަމްޕޫރަށް ވަޑައިގަތުމާއެކު ބޮޑުވަޒީރު އަންވަރު އިބްރާހީމް ދެންނެވި ހޫނު މަރުހަބާގެ ސަބަބުން ވަރަށް ބޮޑު އުފަލެއް ލިބިވަޑައިގެންފައިވާ ކަމަށެވެ. އަދި ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށް ކުރެވޭ މަޝްވަރާތަކަށް އުންމީދު ކުރައްވާ ކަމަށްވެސް އެމަނިކުފާނު ވިދާޅުވިއެވެ.
މި ދަތުރުފުޅުގެ ތެރެއިން މިއަދު ދެ ގައުމުގެ ބޮޑުވަޒީރުންގެ މެދުގައި ރަސްމީ ބައްދަލުވުންތައް ބޭއްވުމަށް ވަނީ ހަމަޖެހިފައެވެ. މި ބައްދަލުވުންތަކުގައި ދެ ގައުމުގެ ގުޅުން އިތުރަށް ފުޅާކުރުމަށްޓަކައި މުހިންމު އެއްބަސްވުންތަކެއްގައި ސޮއިކުރާނެ ކަމަށް ބެލެވެއެވެ. ހާއްސަކޮށް ދިފާއީ ދާއިރާއާއި އިގްތިސާދީ ދާއިރާއިން ގުޅުން ބަދަހިކުރުމަށް ބޮޑުވަޒީރު މޯދީ ވަނީ އިސްކަންދެއްވައިފައެވެ.
ބޮޑުވަޒީރު މޯދީ އިއްޔެ މެންދުރުފަހު މެލޭޝިޔާގައި ދިރިއުޅޭ އިންޑިއާގެ ރައްޔިތުންނާ ބައްދަލުކުރެއްވުމަށްވެސް ވަނީ ހަމަޖެހިފައެވެ. މެލޭޝިޔާގައި އިންޑިއާއަށް ނިސްބަތްވާ ގާތްގަނޑަކަށް ތިން މިލިއަން މީހުން ދިރިއުޅެއެވެ. މިއީ ދުނިޔޭގެ އެކި ގައުމުތަކުގައި ދިރިއުޅޭ އިންޑިއާ މީހުންގެ އާބާދީއަށް ބަލާއިރު އެންމެ ބޮޑު އެއް އާބާދީއެވެ.
އިންޑިއާގެ ހާރިޖީ ވުޒާރާގެ ތަރުޖަމާނު ރަންދީރު ޖައިސްވާލް ވިދާޅުވީ، މި ދަތުރުފުޅުގެ ސަބަބުން އިންޑިއާއާއި މެލޭޝިޔާގެ ދެމެދުގައި އޮތް ހާއްސަ ގުޅުމަށް އިތުރު ދިރުމެއް ލިބިގެންދާނެ ކަމަށެވެ.