ރާއްޖޭގެ އެންމެ ބޮޑު ފުޓްސަލް މުބާރާތް، ހިއުންޑާއި ގޯލްޑަން ފުޓްސަލް ޗެލެންޖު 2026ގެ ކުއާޓާ ފައިނަލްގެ ޖާގައެއް ރ. ދުވާފަރުން ހޯދައިފިއެވެ.
އެ ގޮތުން ދުވާފަރުން ވަނީ 5-3 އިން ސ. ހިތަދޫ ބަލިކޮށްފައެވެ.
ދުވާފަރާއި ހިތަދޫގެ ކުރިމަތިލުން ފޯރިގަދަކޮށް ދިޔައިރު، ދެ ޓީމުން ވެސް މުހިންމު ވަގުތުތަކުގައި ގޯސްތަކެއް ހެދިތަން މި މެޗުގައި ފެނިގެންދިޔައެވެ. ހިތަދޫން ވެސް ލީޑެއް ނެގި މި މެޗުގައި އެ ޓީމުގެ ޝާޝް ޝަރީފް ދެ ލަނޑު ޖެހިއެވެ. އަނެއް ލަނޑު ޖެހީ މުހައްމަދު ސަބާހު މަންސޫރު (ސަބަޓީ) އެވެ.
ދުވާފަރުން ލަނޑުތައް ޖެހީ މުހައްމަދު ނޫހު އިބްރާހިމް، މުހައްމަދު ޖުމާން އަހުމަދު، އިބްރާހިމް އަނާން އަލީ، އަބްދުﷲ ލޫތު އިބްރާހިމް (ސާނޭ) އަދި ހަސަން އަޒޫމް އަލީ (ޒޫމް) އެވެ. އަޒޫމް އަތުން މި މެޗުގައި ޕެނަލްޓީއެއް ވެސް ވަނީ ނާކާމިޔާބުވެފައެވެ.
މި މަހުގެ އަށް ވަނަ ދުވަހު ކުޅޭ ކުއާޓާ ފައިނަލް މެޗުގައި ދުވާފަރު ނުކުންނާނީ އޭދަފުށްޓާއި ދެކޮޅަށެވެ.