ޕީއެންސީއަށް ނިސްބަތްވާ ކައުންސިލަރުން މާލޭގެ މޭޔަރު އާދަމް އާޒިމަށް އެއްބާރުލުން ދެމުންދާ ކަމަށް މާލޭގެ ޑެޕިޔުޓީ މޭޔަރު މުހައްމަދު އަރީޝް ވިދާޅުވެއްޖެއެވެ.
މާފަންނު ހުޅަނގު ދާއިރާގެ ގޮނޑިއަށް ވާދަކުރައްވާ ޕީއެންސީގެ ކެންޑިޑޭޓުގެ ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ވާހަކަދައްކަވަމުން އަރީޝް ވިދާޅުވީ މާލޭ ސިޓީގެ މޭޔަރުކަމަށް ރައީސް ޑރ. މުހައްމަދު މުޢިއްޒު ވަޑައިގެންނެވީ ފޮތެއް ނުވަތަ ސްޓްރެޓެޖިކް އެކްޝަން ޕްލޭނެއް ހިއްޕަވައިގެން ކަމަށެވެ. އެ ޕްލޭނުގައި އޮތީ މާލެއަށް ކުރިމަތިވެފައި ހުރި ތަފާތު ގިނަ މައްސަލަތަކުގެ ހައްލުތައް ކަމަށްވެސް އޭނާ ވިދާޅުވިއެވެ.
އަރީޝް ވިދާޅުވީ ރައީސްގެ މޭޔަރުކަމުގައި ހަފުތާއަކު އެއް ދުވަހު ދާއިރާތަކުގެ ގެތަކަށް ޒިޔާރަތްކުރައްވައި ރައްޔިތުންގެ އަޑުއައްސަވައި، ރައްޔިތުންގެ ބޭނުންތަކަށް ބައްލަވައިގެން މަސައްކަތް ފެއްޓެވި ކަމަށެވެ. އެ މަސައްކަތްޕުޅުގެ ނަތީޖާއަކީ މާލޭގައި ހުރި މައްސަލަތަކަށް ހައްލުތައް ހޯދައިދެވި މާލެއަކީ ޒީނަތްތެރި ތަނެއްގެ ގޮތުގައި ތަރައްގީކުރުމުގެ މަސައްކަތް ފެށުން ކަމަށްްވެސް ވިދާޅުވި އެވެ.
މިއަދު މާލެ ސިޓީގައި ހިނގަމުންދާ ތަރައްގީގެ މަސައްކަތްތަކަކީ އަދި ސިޓީ ކައުންސިލުން ކުރަމުންދާ ގިނަ މަސައްކަތްތަކަކީ ރައީސްގެ މޭޔަރުކަމުގައި އެމަނިކުފާނު އެކުލަވައިލެއްވި ސްޓްރެޓެޖިކް އެކްޝަން ޕްލޭނުގައި ހިމެނުނު ކަންތައްތައްކަން އަރީޝް ފާހަގަކުރެއްވިއެވެ.
އޭނާ ވިދާޅުވީ މާލޭގެ މިހާރުގެ މޭޔަރު އާދަމް އާޒިމަށް ވެސް ކަންކަން ކުރެވެނީ ޕީއެންސީގެ ކައުންސިލަރުންގެ އެއްބާރުލުން ލިބޭތީ ކަމަށެވެ.
އަރީޝް ވިދާޅުވީ މާފަންނު މައިޒާނުގެ މަސައްކަަތަކީ އޭނާގެ އިސްނެގުމަށް ކުރެވުނު މަސައްކަތެއް ކަމަށެވެ. އެ މައިޒާނުގައި ހުރި ބަސް ސްޓޮޕުގެ މަސައްކަތް ކުރުމަށް މޯލްޑިވްސް އިސްލާމިކް ބޭންކާއެކު މަޝްވަރާތައް ފެއްޓެވީވެސް އޭނާކަމަށާއި ނަމަވެސް ކުއްލި ގޮތަކަށް މެންދަމެއްގައި އެއްބަސްވުމުގައި ސޮއިކޮށް ފޮޓޯ ނަންގަވައި އެ މަސައްކަތުގެ ކްރެޑިޓު މިހާރުގެ މޭޔަރު ނެންގެވިކަމަށް ވިދާޅުވިއެވެ.
”ހަގީގަތަކީ މޭޔަރު މާލެ ސިޓީގައި އެކުރައްވާ މަސައްކަތުގެ 99 އިންސައްތަ މަސައްކަތަކީ އަަޅުގަނޑުމެންގެ މަސައްކަތް. އަޅުގަނޑުމެން އެއް ޕަސެންޓުވެސް އިތުބާރުނުދީފިނަމަ އެއްކަމެއްވެސް އެބޭފުޅާއަށް ނުކުރެއްވޭނެ. އަޅުގަނޑުމެންނަށް ދަސްކޮށްދެއްވީ އެއްބާރުލުންދޭން. ރައްޔިތުންނަށް ފައިދާހުރި ހުރިހާ ކަމެއްގައި އެއްބާރުލުންދީ އެހީތެރިވާން ދަސްކޮށްދެއްވާފައި ރައީސުލްޖުމްހޫރިއްޔާ މޭޔަރުކަމުން ވަޑައިގަތީ،“ އަރީޝް ވިދާޅުވިއެވެ.