ށ. މިލަދޫގައި މި ސަރުކާރުން ގާއިމުކުރި އެ ރަށުގެ ސިއްހީ މަރުކަޒުގެ އައު އިމާރާތް ސިއްހަތާ ބެހޭ ވަޒީރު އަބްދުﷲ ނާޒިމު ހުޅުވައިދެއްވައިފިއެވެ.
އަތޮޅު ތެރޭގެ ސިއްހީ ހިދުމަތުގެ ފެންވަރު ރަނގަޅުކުރުމަށް ބޭނުންވާ އުމްރާނީ ވަސީލަތްތައް ގާއިމުކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ނ.މިލަދޫގައި ގާއިމުކުރި ސިއްހީ މަރުކަޒު ސިއްހަތާ ބެހޭ ވަޒީރު ނާޒިމު ހުޅުވައިދެއްވީ އެ އަތޮޅުގެ ރަށްރަށަށް ވަޒީރު ކުރައްވަމުންދާ ދަތުރުފުޅުގެ ތެރެއިންނެވެ.
މިލަދޫ ސިއްހީ މަރުކަޒު ހުޅުވައިދެއްވުމުގެ އިތުރަށް އެ ރަށާއި ނ.މާޅެންދޫގައި އަލަށް ފެށި ލެބޯޓަރީގެ ހިދުމަތްވެސް ވަޒީރުވަނީ އިފުތިތާހުކޮށްދެއްވާފައެވެ.
ސިއްހީ މަރުކަޒު ހުޅުވުމަށް ބޭއްވި ރަސްމިއްޔާތުގައި ދެއްކެވި ވާހަކަފުޅުގައި ނާޒިމު ފާހަގަކުރެއްވި ގޮތުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ރަށްރަށަށް ކުރެއްވި ދަތުރުފުޅުތަކުގެ ތެރެއިން ރައްޔިތުން އެންމެ ބޮޑަށް އެދެމުން އައި އެއްކަމަކީ ކޮންމެ ރަށެއްގައިވެސް ލެބޯޓަރީ ހިދުމަތް ގާއިމުކުރުމެވެ.
ނާޒިމު ވިދާޅުވި ގޮތުގައި ރައްޔިތުން އެދޭ ގޮތަށް ސިއްހީ މަރުކަޒުތަކުގައި ލެބޯޓަރީ ހިދުމަތް ގާއިމުކޮށް، އެ ހިދުމަތް ހުރިހާ ރަށަކަށް ފުޅާކުރުމުގެ މަސައްކަތް 2026 ވަނަ އަހަރުގެ ނިޔަލަަށް ނިންމެވުމަކީ ރައީސްގެ އަމާޒެކެވެ. އެމަނިކުފާނު ކަނޑައެޅުއްވި އެ އަމާޒަށް ވާސިލުވުމަށް ސިއްހީ ދާއިރާގެ އެންމެހައި ފަރާތްތައް ގުޅިގެން މަސައްކަތްކުރަމުންދާކަމަށް ވަޒީރު ވިދާޅުވިއެވެ.
މިލަދޫ ސިއްހީ މަރުކަޒަށް 18 އަހަރުވީއިރު، ރަށުގެ އާބާދީއަށާއި ރައްޔިތުންގެ ބޭނުންތަކަށް އައި ބަދަލުތަކާ އެކަށޭނެ ގޮތެއްގައި އެ ރަށުގެ ސިއްހީ މަރުކަޒު ތަރައްގީކުރެވިފައި ނެތުމުގެ ސަބަބުން ޖާގައިގެ ދަތިކަން އޮތީ އިންތިހާއަށް ކުރިމަތިވެފައެވެ.
އެ މައްސަލަ ހައްލުކުރުމަށް ސަރުކާރުން ކުރި މަސައްކަތުން އެ ރަށުގެ ސިއްހީ މަރުކަޒަށް އިތުރުކުރެވުނު އިމާރާތާއެކު ބަލި ޖެހުމުގެ ކުރިން ބަލިތަކުން ރައްކާތެރިވުމަށް ނުވަތަ ޕްރިވެންޓޭޓިވް ކެއާގެ ހިދުމަތްތައް ފޯރުކޮށްދިނުމުގެ މަސައްކަތް ފުޅާކުރުމަށް މަގުފަހިވާނެ ކަމުގައި ހެލްތު މިނިސްޓްރީން ބުނެފައިވެއެވެ.