ރާއްޖޭގެ އެންމެ ބޮޑު އަދި އެންމެ ޝަރަފުވެރި ފުޓްސަލް މުބާރާތް، ހިއުންޑާއި ގޯލްޑަން ފުޓްސަލް ޗެލެންޖް 2026 ގެ ޒޯން ޗެމްޕިއަންކަން ރ. ދުވާފަރު ހޯދައިފިއެވެ.
ރޭ ދުވާފަރުން ޒޯން ތަށި ނެގީ ށ. ކަނޑިތީމު ކައިރިން 2-0 އިން ފައިނަލް މެޗު ކާމިޔާބުކޮށްގެންނެވެ. ފޯރިގަދަކޮށް ފެނުނު މެޗުގައި ދުވާފަރުގެ ގޯލްތައް ޖެހީ އިބްރާހީމް އަނާން އަލީއާއި އަހުމަދު އީސައެވެ. ކަނޑިތީމުގެ މުހައްމަދު ޝާނަށް މެޗު ތެރެއިން ރަތް ކާޑު ދެއްކި އިރު، މުހައްމަދު އިޝާނަށްވެސް ރެފްރީ ވަނީ ރަތެއް ދައްކާފައެވެ. އޭގެ އިތުރުން ކަނޑިތީމުގެ ފަސްޓް އެއިޑް މުހައްމަދު ރަޝީދަށްވެސް ރަތެއް ދައްކާފައިވެއެވެ.
މި ޒޯން އެންމެ މޮޅު ކުޅުންތެރިޔާ އަދި ޓޮޕް ސްކޯރާއަކީވެސް ދުވާފަރުގެ މުހައްމަދު އިޝާމް (ޝަންޓެ)އެވެ.
ޒޯން ބުރަށްފަހު ދެން އޮންނާނީ މުބާރާތުގެ ގަދަ 16 އެވެ. ގަދަ 16 ގެ މެޗުތައް އޮންނާނީ މިމަހުގެ ފަސްވަނަ ދުވަހު ހަވީރާއި އެރޭގައެވެ.
މިގޮތުން ދުވާފަރު އެދުވަހު ހަވީރު ނުކުންނާނީ އައްޑޫ ހިތަދޫ އާއި ދެކޮޅަށެވެ. އިތުރުން މެޗުތަކަށް ބަލާއިރު. އޭދަފުށި ބައްދަލުކުރާނީ މައްޗަންގޮޅި އާއެވެ. ނާވައިދޫ ދިއްގަރާއި ބައްދަލުކުރާއިރު މަތިވެރި ނުކުންނާނީ އިސްދޫއާއި ދެކޮޅަށެވެ. އަދި ތިމަތަފުށިން ބައްދަލުކުރާނީ މާރަންދޫއާއި އެވެ. މީގެ އިތުރުން ދެއްވަދޫ އިން ކެޔޮދޫއާއި ބައްދަލުކުރާއިރު ކުޑަހުވަދޫ ނުކުންނާނީ ކަނޑިތީމުއާއިއެވެ. ގަދަ 16 ގައި ވިލިމާލެ ނުކުންނާނީ ގާފަރާއި ދެކޮޅަށެވެ.