ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ޖަޕާނުގެ ޤައުމީ ދުވަހާ ގުޅިގެން، ޖަޕާނުގެ އެމްޕަރަރ ނަރުހިތޯއަށާއި، ބޮޑުވަޒީރު ޝިގެރު އިޝިބާއަށާއި، ޖަޕާނުގެ ސަރުކާރަށާއި ރައްޔިތުންނަށް ތަހުނިޔާ ފޮނުއްވާފައެވެ.
ޖަޕާނުގެ އެމްޕަރަރަށާއި ބޮޑުވަޒީރަށް ފޮނުއްވި ސިޓީގައި ރައީސުލް ޖުމްހޫރިއްޔާ ފާހަގަކުރެއްވި ގޮތުގައި ދިވެހިރާއްޖެއާއި ޖަޕާނާ ދެމެދު އޮތް ދިގު މުއްދަތުގެ ރަޙްމަތްތެރިކަމަކީ އެކަކު އަނެކަކަށް އިޙްތިރާމްކުރުމާއި، އިތުބާރުގެ މައްޗަށް ބިނާވެފައިވާ ގުޅުމެއްކަމަށް ވަނީ ވިދާޅުވެފައެވެ. އަދި މީގެއިތުރުން ރައީސް ވަނީ ދިވެހިރާއްޖޭގެ ތަރައްޤީއަށް އެކި ދާއިރާތަކުން ޖަޕާނުން ދެމުންގެންދާ އެހީތެރިކަމަށް ޝުކުރު އަދާކުރައްވާފައެވެ. އަދި ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކޮށް، ޕާޓްނަރޝިޕް ކުރިއެރުވުމަށް ސަރުކާރުން ކުރަމުންދާ މަސައްކަތް ހާމަކުރައްވާފައެވެ.
ރައީސް ޑރ. މުޢިއްޒު ވަނީ އެމްޕަރަރާއި ބޮޑުވަޒީރުގެ ދުޅަހެޔޮކަމާއި ދުޅަހެޔޮ ސިއްޙަތަށް އެދިވަޑައިގަންނަވާ ކަމަށާއި، ޖަޕާނުގެ ރައްޔިތުންގެ ކުރިއެރުމާއި ފާގަތިކަމަށް އެދިވަޑައިގަންނަވާ ކަމަށް ވިދާޅުވެފައެވެ.
ޖަޕާނުގައި ޤައުމީ ދުވަސް ފާހަގަކުރަނީ ވެރިކަމުގައި ހުންނަވާ އެމްޕަރަރގެ އުފަންދުވަހުގެ ގޮތުގައެވެ. މިހާރު އެ ދުވަހަކީ ފެބްރުއަރީ 23 އެވެ.