ޔޫއެފާ ޗެމްޕިއަންސް ލީގުގައި ރޭގައި ކުޅުނު މެޗުގެ އިތުރު ވަގުތުގައި ގޯލްކީޕަރު އެނަޓޮލީ ޓްރޫބިން ޖެހި ލަނޑުން 4-2 ން ރެއާލް މެޑްރިޑްގެ މައްޗަށް ބެންފީކާއިން ކުރި ހޯދައި ޕްލޭއޮފް ބުރުން ޖާގަ ހޯދައިފިއެވެ.
މަޝްހޫރު ހޯޒޭ މޮރީނިއޯގެ ޓީމުން، ރެއާލްގެ މައްޗަށް ހޯދި މޮޅާ އެކު ބެންފީކާ ވަނީ ޕްލޭއޮފް ބުރުން ޖާގަ ހޯދައިފައެވެ. އަދި ރެއާލް އަށް ކުރިމަތިވީ ބައްޔާ އެކު އެ ޓީމު ފުރޮޅާލީ ޕްލޭއޮފް ބުރަށެވެ.
ރެއާލްގެ ދެ ލަނޑު ވެސް ޖެހީ ކިލިއަން އެމްބާޕޭއެވެ. މެޗުގެ 30 ވަނަ މިނެޓްގައި އޭނާ ޖެހީ ލަނޑާ އެކު ރެއާލް އަށް ލިޑް ނަގައި ދިނެވެ. އަދި އެ ލަނޑުން އެމްބާޕޭ ވަނީ ލީގު މަރުހަލާގައި އޭނާ ޖެހި ލަނޑުގެ އަދަދު 12 އަށް އަރުވައި ރެކޯޑެއް ވެސް ހަދައިފަ އެވެ.
ލީޑް ނެގުނަސް އަލްވާރޯ އާބެލާއޯގެ ޓީމުގެ ޑިފެންސް ފެނުނީ ބަލިކަށިކޮށެވެ. މެޗުގެ 36 ވަނަ މިނެޓްގައި އަންޑްރެއަސް ޝެލްޑްރެޕްގެ ލަނޑުން ބްނފީކާއިން ނަތީޖާ ހަމަހަމަ ކުރިއެވެ. އަދި ފުރަތަމަ ހާފު ނިމުމުގެ ކުރިން ވަންނޭލިސް ޕަވްލީޑީސްގެ ޕެނަލްޓީން ބެންފީކާއިން ލީޑް ވެސް ނެގިއެވެ.
ދެވަނަ ހާފަށް ނުކުމެ ޝެލްޑްރެޕް ބެންފީކާގެ ލިޑް ފުޅާކޮށްދިންނެވެ. އެމްބާޕޭގެ އިތުރު ލަނޑަކާ އެކު ރެއާލަށް ކުރެވުނު ހަމައެކަނި ކަމަކީ ނަތީޖާގެ ފަރަގު ކުޑަކޮށްލުމެވެ.
ޕްލޭއޮފް ބުރަށް ބެންފީކާއަށް ވަދެވެން އޮތް ގޮތަކީ އެ ޓީމުގެ ލަނޑު ޑެފިސިޓް ކުޑަކޮށެގެންނެވެ. އެ ފުރުސަތު ހޯދަން އެންމެ ފަހު ވަގުތު ކުރިއަށް ނުކުތީ ކީޕަރު ޓްރޫބިން އެވެ. މެޗުގެ އިތުރު ވަގުތުގައި ބެންފީކާ އަށް ހިލޭ ޖެހުން ލިބުމުން އޭނާ ކުރިއެރި އެވެ. ފްރެޑްރިކް އަރްޝްނެސް ހިލޭޖެހުމުން ނަގައިދިން ބޯޅަ ބޮލުން ފޮނުވާލައި ޓްރޫންބިން ވަނީ އެޓީމަށް މުހިންމު ލަނޑެއް ކާމިޔާބުކޮށްދީފައެވެ.
ރެއާލް ފަހު ވަގުތުކޮޅު ކުޅުނީ ދެ ކުޅުންތެރިން މަދުކޮށެވެ. އެ އެއީ އެސެންސިއޯ އާއި ރޮޑްރިގޯ ގޮއިސް އަށް ރަތް ކާޑް ދެއްކުމުންނެވެ.