އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) ގައި ގާއިމުކުރި ކެތު ލެބުން ހިދުމަތް ދޭން ފަށައިފިއެވެ.
އެތަނުން ބުނީ އިއްޔެ އިން ފެށިގެން ހިތުގެ ބަލިމީހުންނަށް ފަރުވާން ދޭން ފެށި އިރު، ކެތު ލެބްގެ ހިދުމަތް ފެށީ އައިޖީއެމްއެޗާ ހަވާލުކޮށްގެންނެވެ.
އޭއީއެޗުން މިއަދު ބުނީ ހިދުމަތް ފެށިތާ ދެ ދުވަސްތެރޭ 7 މީހަކަށް ހިދުމަތް ދީފައިވާ ކަމަށެވެ. ސީއީއޯ ޑރ. އިބްރާހިމް ޔާސިރު ވިދާޅުވީ އޭގެ ތެރޭގައި ހިމެނެނީ އެންޖިއޯ ގްރާމްގެ ފަރުވާ ހޯދި ހަތަރު މީހަކާއި ސިކުނޑީގެ އެންޖިއޯ ގްރާމްގެ ފަރުވާ ދިން އެކަކާއި އެންޖިއޯ ޕްލާސްޓީގެ ހިދުމަތް ހޯދި ދެ މީހެކެވެ.
އެންޖިއޯ ގްރާމަކީ މައްސަލައެއް ހުރިތޯ ބެލުމަށް ހަދާ ޓެސްޓެކެވެ. އޭގެ އަސްލު ފަރުވާއަކީ އެންޖިއޯ ޕްލާސްޓީ އެވެ.
ޔާސިރު ވިދާޅުވީ ކެތު ލެބް ހުޅުވަން ފާއިތުވި މުއްދަތުގެ ތެރޭގައި ގިނަ މަސައްކަތްތަކެއް ކުރި ކަމަށާއި އޭގެ ތެރެއިން، ބޭރުގެ ބަޔަކާ ހަވާލުކޮށްގެން ވެސް އެތަން ހިންގަން އުޅުނު ކަމަށެވެ. އޭނަ ވިދާޅުވީ އެންމެ ފަހުން ސަރުކާރުުގެ އެންމެ ބޮޑު ހޮސްޕިޓަލް ކަމަށްވާ އައިޖީއެމްއެޗްގެ ކާޑިއެކް ސެންޓަރާ ގުޅިގެން ކެތުގެ ހިދުމަތް ދޭން ފެށުމަކީ ދެކުނުގެ ހުރިހާ އަތޮޅަކަށް ވެސް އޭގެ ފަސޭހަ އާއި ލުއިކަން ލިބޭނެ ކަމެއް ކަމަށެވެ.
އައިޖީއެމްއެޗްގެ ހިތުގެ ބަލިތަކުގެ ޑޮކްޓަރު، ޑރ. ޝަނީޒް ނަޒްމީ ވިދާޅުވީ އައްޑޫން ކެތުގެ ލެބްގެ ހިދުމަތް ލިބުމަކީ ބޮޑު އުފަލެއް ކަމަށާއި އެކަމުގެ ފައިދާ ގިނަ ބަޔަކަށް ލިބޭނެ ކަމަށެވެ. އޭނަ ވިދާޅުވީއައްޑޫ ކެތު ލެބާއެކު، ހިތާ ގުޅުން ހުރި މައްސަލަތަކުން 60-70 ޕަސެންޓް ކޭސްތައް މާލެއިން ނުފޮނުވައި، އައްޑޫގައި ފަރުވާ ދެވޭނެ ކަމަށެވެ.