ދިރާސީ އާ އަހަރުގެ ކިޔެވުން ރާއްޖޭގައި ކިޔަވައިދޭ ހުރިހާ ސްކޫލެއްގައި މިއަދު ފަށައިފިއެވެ.
ޖުމްލަ 77000 އަށްވުރެ ގިނަ ދަރިވަރުންނާއެކު މިއަދު ސްކޫލުތަކުގެ ކިޔެވުން ފެށިފައި ވަނީ ގާތްގަނޑަކަށް ދޮޅުމަހަށް ވުރެ ގިނަ ދުވަހުގެ ބަންދަކަށްފަހުގައެވެ.
218 ސްކޫލެއްގައި މިއަދު ކިޔެވުން ފެށިއިރު، މާލެ ސަރަހައްދުގައި ވަނީ އާ އެއް ސްކޫލެއްގައި ކިޔެވުން ފަށައިފައެވެ. އެއީ ހުޅުމާލޭ ދެވަނަ ފިޔަވަހީގައި އަލަށް އިމާރާތް ކުރި ޝަހީ އަލީ ސްކޫލެވެ. އެ ސްކޫލްގައި ކިޔަވައިދިނުމަށް ހަމަޖެހިފައިވާ ދެ ދަންފަޅިއަށެވެ.
ދިރާސީ އާ އަހަރުގެ ކިޔެވުން ފެށިފައިވާއިރު، އެޑިއުކޭޝަން މިނިސްޓްރީން ވަނީ ގިނަ މަސައްކަތްތަކެއްކޮށްފައެވެ. އެގޮތުން ދަރިވަރުންނަށް ބޭނުންވާ ޓެކްސް ފޮތްތައް ސްކޫލުތަކަށް ފޮނުވުމުގެ މަސައްކަތްވެސް މިހާރު ވަނީ ނިމިފައެވެ. އަދި ސްކޫލްތަކަށް ބޭނުންވާ ޓީޗަރުން ވެސް ވަނީ ހަމަކޮށްފައެވެ.
އެކަޑަމިކް ކަލަންޑަރުގައިވާ ގޮތުން، މިއަދު ފެށުނު ދިރާސީ އަހަރުގެ ފުރަތަމަ ޓާމުގެ މިޑް ބްރޭކް ދަރިވަރުންނަށް ލިބޭނީ މެއި މަހުގެ 24 ވަނަ ދުވަހުން 30 ވަނަ ދުވަހުގެ ނިޔަލަށެވެ. އަދި ފުރަތަމަ ޓާމުގެ ކިޔެވުން ނިންމައި ދަރިވަރުން ޗުއްޓީއަށް ދާނީ ޖުލައި މަހުގެ 17 ވަނަ ދުވަހުން އޮގަސްޓް މަހުގެ އެއްވަނަ ދުވަހުގެ ނިޔަލަށެވެ.
ދެވަނަ ޓާމުގެ ކިޔެވުން ފެށޭނީ އޮގަސްޓް މަހުގެ ދެވަނަ ދުވަހު ކަމަށާއި، ދެވަނަ ޓާމުގެ ކިޔެވުން ނިމި ބޮޑު ޗުއްޓީއަށް ދަރިވަރުން ދާނީ ޑިސެމްބަރު މަހުގެ 18 ވަނަ ދުވަހުން 2027 ވަނަ އަހަރުގެ ޖެނުއަރީ މަހުގެ 12 ވަނަ ދުވަހުގެ ނިޔަލަށް ކަމަށް އެކަޑަމިކް ކަލަންޑަރުގައިވެއެވެ. 2027 ވަނަ އަހަރުގެ ދިރާސީ އަހަރުގެ ކިޔެވުން ފެށޭނެކަމަށް ކަނޑައަޅާފައި ވަނީ އެ އަހަރުގެ ޖެނުއަރީ މަހުގެ 17 ވަނަ ދުވަހުގައެވެ