ތަރައްގީ މަޑުޖައްސާލަން އުޅޭ ބަޔަކު ކައުންސިލްތަކަށް ހޮވިއްޖެނަމަ ތަރައްގީގެ މަޝްރޫއުތައް ހިންގަން ސަރުކާރަށް އުނދަގޫވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީއެންސީން ރޭ ބޭއްވި ކެމްޕޭން އިވެންޓެއްގައި ރައީސް ވިދާޅުވީ އޭޕްރީލް 4 ވަނަ ދުވަހު ރައްޔިތުން ނުކުމެ ޕީއެންސީގެ ކެންޑިޑޭޓުން އިންތިހާބުކޮށްދީފިނަމަ ތަރައްގީގެ މަޝްރޫއުތައް ހިންގަން ރައްޔިތުންނަށް ފަސޭހަވާނެ ކަމަށެވެ.
”މި ކަންކަން ކުރަން ޖާގަ ދިނުމަކީ އެއްވެސް ރައްޔިތުން ކުރަން ބޭނުންވާނެ ކަމެއް ނޫން، އެކަމަށް ޖާގަ ނުދެއްވާ ރައްޔިތުންނާ އެކު މި އޮތް ސަރުކާރު ރައްޔިތުންނާ އެކު ކުރާ މަސައްކަތާ އެކު ކުރިއަށް ވަޑައިގަންނަވަން އަޅުގަނޑުމެންނާ އެކު މި ނުކުންނަ ކެންޑިޑޭޓުން ހޮވައިދެއްވާށޭ،“ ރައީސް ވިދާޅުވި އެވެ.
ރައީސް ވިދާޅުވީ، މި ސަރުކާރަކީ ރައްޔިތުންގެ ފަޅީގައި އޮތް ސަރުކާރެއް ކަމަށާއި، މި ސަރުކާރު އޮތީ ރައްޔިތުންނާއި އެކުގައި ރައްޔިތުންނާއި އެކުގައި ކަމަށެވެ.
”ރައްޔިތުންނާއި ބައްދަލުކޮށް، ރައްޔިތުންގެ އަޑު އަހައި، ރައްޔިތުންގެ ވިންދާއި އިހުސާސްތައް ގާތުން ދެނެގަނެ، އެއާ އެއްގޮތަށް ކަންކަން ކުރާ ސަރުކާރެއް، އެހެންވީމަ ރައްޔިތުންނާއި ސަރުކާރާއި މެދަށް އިދިކީލަ ވިސްނުންތަކެއް ނުވައްދަވާށޭ، ވައްދަން ފުރުސަތު ނުދެއްވާށޭ، ސިޔާސީ ސަކަރާތް ޖެހުމާއި، ސިޔާސީ ޖަގަޑާ ހެދުމާއި، އެކި ކަހަލަ ގޮތްގޮތުން ރައްޔިތުންނާއި ސަރުކާރާ ދޭތެރެއަށް ހުރަސްތަކެއް ކުރިމަތިވާނެ ފުރުސަތު ކައުންސިލް އިންތިހާބުގައި ނުދެއްވާށޭ، މި ސަރުކާރު މި އޮތީ އަޅުގަނޑުމެންގެ ރައްޔިތުންނާއި އެކީގައި،“. ރައީސް ވިދާޅުވިއެވެ.
ޕީއެންސީގެ ޓިކެޓްގައި މާލޭގެ މޭޔަރު ކަމަށް ވާދަކުރައްވާ މޭޖޭ ޖެނެރަލް ރިޓަޔާޑް މޫސާ އަލީ ޖަލީލަކީ ފަސްބައިގައި އެއްވެސް ކިލަނބުކަމެއް ނެތް ސާފު ބޭފުޅެއް ކަމަށް ރައީސް ވިދާޅުވިއެވެ. އަދި އޭނާ ޕީއެންސީގެ ފަރާތުން މޭޔަރު ކަމަށް ކުރިމަތިލެއްވީ އެމަނިކުފާނުގެ އެދިވަޑައިގަތުމަކަށް ކަމަށް ވެސް ރައީސް ވިދާޅުވިއެވެ.