ވެނެޒުއޭލާ އިން ހިފަހައްޓާފައިވާ ތެޔޮ ޓޭންކަރުތަކުގައި ހުރި ތެޔޮ އެމެރިކާ އިން ނަގައި، އެ ގައުމުގެ ރިފައިނަރީތަކުގައި އެ ތެޔޮ ސާފުކުރާނެ ކަމަށް ރައީސް ޑޮނަލްޑް ޓްރަމްޕް ބުނެފިއެވެ.
ޓްރަމްޕް މިހެން ބުނެފައިވަނީ ހޮނިހިރު ދުވަހު ”ނިއު ޔޯކް ޕޯސްޓް“ ނޫހަށް ދެއްވި އިންޓަވިއުއެއްގައެވެ.
”މިކަން އޮތް ގޮތް ބުނެދޭނަން، އެމީހުންގެ އަތަކު މިހާރު ތެލެއް ނުހުންނާނެ. އެ ތެޔޮ މިހާރު ވަނީ އަހަރެމެންގެ ބާރުގެ ދަށަށް ގެނެސްފައި،“ ޓްރަމްޕް ބުނެފައިވެއެވެ.
ޓްރަމްޕް އިތުރަށް ބުނި ގޮތުގައި، މި ތެޔޮ ސާފުކުރުމުގެ މަސައްކަތް ހިއުސްޓަން ހިމެނޭ ގޮތަށް އެކި ސަރަހައްދުތަކުގައި ދަނީ ކުރަމުންނެވެ.
ވެނެޒުއޭލާގެ ތެޔޮ ބޭރުކުރުން ކޮންޓްރޯލް ކުރުމަށް ޓްރަމްޕް ފފެށި އެއް މަސް ދުވަހުގެ ކެމްޕޭނުގެ ތެރެއިން، އެމެރިކާގެ އަސްކަރިއްޔާ އިން މިހާތަނަށް ވެނެޒުއޭލާ އާ ގުޅުންހުރި ހަތް ތެޔޮ ޓޭންކަރެއް ވަނީ ހިފަހައްޓާފައެވެ.
މީގެ އިތުރުން، އޭނާގެ ސަރުކާރުން ވެނެޒުއޭލާގެ 50 މިލިއަން ފީފާ ތެޔޮ އަތުލާފައިވާ ކަމަށާއި، އޭގެ ތެރެއިން ބައެއް ތެޔޮ މިހާރު ހުޅުވާލެވިފައިވާ ބާޒާރުގައި ވިއްކަމުންދާ ކަމަށް ވެސް އަންގާރަ ދުވަހު ޓްރަމްޕް ބުންޏެވެ.